بلیا: مدھیہ پردیش کے وزیر اعلی شیوراج سنگھ چوہان نے اتوار کو کہا کہ یوپی ملک کا انجن ہے اور اس کی ترقی کے لئے مودی۔یوگی کی ڈبل انجن کی حکومت ضروری ہے ۔یہاں سے بی جے پی کے جن وشواس یاترا کا آغاز کرتے ہوئے شیوراج نے کہا کہ‘یہ یوگی۔ مودی ٹیم کاہی نتیجہ ہے کہ یوپی اتنی تیزی کے ساتھ ایک ترقی یافتہ صوبہ بنا ہے ۔مجھے پورا اعتماد ہے کہ مودی۔یوگی کی لیڈرشپ یوپی کو نہ صرف ملکی بلکہ عالمی پیمانے پر ترقی یافتہ ریاست بنانے میں معاون ثابت ہوگی۔بی جے پی ریاستی صدر سوتنتر دیو سنگھ، یوگی حکومت میں وزیر اوپیندر تیواری، دارا سنگھ چوہان اور آنند سورپت شکلا بھی اس موقع پر موجود تھے ۔مدھیہ پردیش کے وزیر اعلی نے یوپی کو دنیا کی سب سے بڑی معیشت والا صوبہ قرار دیا۔کانگریس کوہدف تنقید بناتے ہوئے انہوں نے کہا‘پارٹی نے کبھی بھی مجاہدین آزادی اور انقلابیوں کو یاد نہیں کیا جنہوں نے ملک کی آزادی کے لئے قربانیاں دی تھیں۔یہ وزیر اعظم نریندر مودی ہیں جو مجاہدین آزادی کو یاد کررہے ہیں۔
