لکھنؤ: اترپردیش میں آدتیہ ناتھ کی حکومت کا آخری بجٹ 22 فروری کو پیش کیا جائیگا۔ اسمبلی کا بجٹ اجلاس 18 فروری کو گورنر آنندی بین پٹیل کے خطاب سے شروع ہوگا۔ وزیر خزانہ سریش کھنہ 2021 -22 کا بجٹ 22 فروری کو پیش کریں گے جو پر پیپر لیس اور ڈیجیٹل ہوگا۔ گزشتہ مالی سال کا بجٹ تقریبا پانچ لاکھ کروڑ کا تھا، اس لیے توقع ہے کہ اس سال بجٹ رقم زیادہ ہوگی۔آئندہ سال اسمبلی انتخابات کے پیش نظر یہ بجٹ عوام کو لبھانے والا ہونے کی توقع ہے ، جس میں خواتین، کسانوں اور نوجوانوں پر زیادہ توجہ دی جاسکتی ہے ۔ امکان ہے کہ حکومت بے روزگاروں کو روزگار فراہم کرنے کسی بڑی اسکیم کا اعلان کرسکتی ہے ۔حکومت ایم ایل اے فنڈکو بحال کرسکتی ہے جو کورونا مدت میں روک دیا گیا تھا۔
