لکھنئو : کانگریس کی جنرل سکریٹری پرینکا گاندھی واڈرا نے کھاد کے بحران کی آڑ میں اتر پردیش حکومت پرنشانہ لگاتے ہوئے کہا کہ کسان مخالف رویہ اختیارکرنے والی یوگی حکومت کی نیت اور پالیسی دونوں میں کھوٹ ہے ۔پرینکا گاندھی نے جمعرات کو ٹویٹ کیا، ‘‘ کسان محنت کرکے فصل تیار کرے تو فصل کی قیمت نہیں ۔ اگر کسان فصل اگانے کی تیاری کرے تو کھاد نہیں۔ کھاد نہ ملنے کے سبب بندیل کھنڈ کے دو کسانوں کی موت ہوچکی ہے ، لیکن کسان مخالف بی جے پی حکومت کے کانوں پر جوں تک نہیں رینگی۔ ان کی نیت اور پالیسی دونوں میں کسان مخالف رویہ ہے ۔اس سے پہلے چہارشنبہ کو بہوجن سماج پارٹی سربراہ مایاوتی نے بھی کھاد کے بحران پر حکومت کو تنقید کا نشانہ بنایا۔ قابل ذکر ہے کہ ریاست میں فوری طور پر کھاد کے بحران کے تعلق سے بندیل کھنڈ سمیت ریاست کے مختلف علاقوں میں کسانوں کو مشکلات کا سامنا ہے ۔ کسان کھاد کے لئے گھنٹوں لمبی قطاروں میں کھڑے ہونے پر مجبور ہیں۔ اس دوران للت پور سمیت دو مقامات پر کسانوں کی جانیں چلی گئیں۔
