نئی دہلی: اتر پردیش کے اسمبلی انتخابات میں تقریباً دو تہائی اکثریت سے کامیابی حاصل کرنے کے بعد ریاست کے وزیر اعلی یوگی آدتیہ ناتھ نے آج وزیر اعظم نریندر مودی سمیت بھارتیہ جنتا پارٹی کی اعلیٰ قیادت سے ملاقات کی اورنئی حکومت کی تشکیل پر تبادلہ خیال کیا۔یوگی آدتیہ ناتھ آج دوپہر غازی آباد کے ہنڈن ہوائی اڈے پر پہنچے۔ اس کے بعد تین بجے نائب صدر ایم وینکیا نائیڈو سے ملاقات کی۔ اس کے بعد وہ وزیر اعظم نریندر مودی کے سات لوک کلیان مارگ پر واقع ان کی رہائش گاہ پہنچے۔ مودی اور یوگی کے درمیان ملاقات ڈیڑھ گھنٹے سے زیادہ چلی۔ یوگی نے مودی کو نئی حکومت کی حلف برداری کے موقع پر لکھنوآنے کی دعوت بھی دی۔وزیر اعظم سے ملاقات کے فوراً بعد انہوں نے بی جے پی صدر جگت پرکاش نڈا سے ملاقات کی۔اس کے بعد وہ وزیر دفاع راج ناتھ سنگھ سے بھی ملے۔ رات میں وہ مرکزی وزیر داخلہ امیت شاہ سے ملنے پہنچے۔بی جے پی نے 37 سالہ پرانا ریکارڈ توڑتے ہوئے دوسری بار ریاستی اسمبلی انتخابات میں دو تہائی اکثریت کے ساتھ کامیابی حاصل کی ہے۔ ماہرین کا کہنا ہے کہ نئی حکومت کی حلف برداری ہولی کے بعد ہونے کا امکان ہے۔ نئی حکومت میں ذات اور علاقائیت کے درمیان توازن قائم کرنے کی کوشش ہوگی۔سیاسی گلیاروں میں یہ خبر بھی گردش کررہی ہے کہ اس بار ریاست کے مختلف حصوں کی نمائندگی کرنے والے چار نائب وزیر اعلیٰ رکھنے کا خیال ہے۔
