لکھنؤ۔ 18فروری (سیاست ڈاٹ کام)اترپردیش حکومت نے منگل کو مالی سال2020۔21 کے لئے پانچ لاکھ 12 ہزار کروڑ کا بجٹ پیش کیا۔بجٹ میں کوئی نیا ٹیکس نہیں لگایا گیا ہے جبکہ بنیادی ڈھانچے کی ترقی کے علاوہ ایکسپریس پروجکٹوں،مذہبی سیاحتی مقامات ااور سماجی سیکورٹی کو اہمیت دی گئی ہے ۔ وزیر اعلی یوگی آدتیہ ناتھ کی موجودگی میں ریاست کے ریاست کے وزیر مالیات سریش کمارکھنہ نے آج اسمبلی میں اپنی حکومت کا چوتھا بجٹ پیش کیا۔بجٹ میں12302.19 کروڑ روپئے کا خسارہ دکھایا گیا ہے جس کے مطابق 500558.53 کروڑ روپئے ریونیو کلکشن کے مقابلے کل خرچہ 512860.72 کروڑ روپئے ہوگا۔حالانکہ ریاستی حکومت نے دعوی کیا کہ جمع پونجی کو اگر اس میں ملا دیا جائے تو مالی خسارہ 3802.19 کروڑ روپئے ہی رہ جائے گا۔حکومت کے اعلان کے مطابق بجٹ تجاویز میں 1097787.35 کروڑ روپئے کی نئی پروجکٹیں شامل کی جائیں گی۔ حکومت کے موجودہ میعاد کار کے چوتھے بجٹ میں بنیاد سہولیات،مذہبی سیاحت،ایکسپریس وے اور سماجی سکیورٹی کو ترجیح دی گئی ہے ۔
