ابوظہبی،3 اکتوبر(یو این آئی) متحدہ عرب امارات نے ویزہ قوانین میں بڑی تبدیلیاں کرتے ہوئے متعدد نئی اقسام کے ویزے متعارف کروا دیے ہیں۔ ان نئے قوانین کے تحت آرٹیفیشل انٹلیجنس کے ماہرین کیلئے خصوصی ویزہ، مختلف ایونٹس، فیسٹیولز، نمائشوں، کانفرنسز اور کھیلوں کی سرگرمیوں میں شرکت کیلئے ایونٹ ویزہ شامل ہے ۔ نئے ویزہ نظام کے تحت کروز شپ یا تفریحی شپ سے آنے والے سیاحوں کو ملٹی پل انٹری ویزہ دیا جائے گا۔ اسی طرح جنگ یا قدرتی آفات سے متاثرہ افراد کو بغیر اسپانسر ایک سالہ رہائشی پرمٹ ملے گا۔ اماراتی حکومت کے مطابق بیوہ خواتین اور طلاق یافتہ خواتین اب بغیر اسپانسر رہائش حاصل کر سکیں گی۔ رشتہ داروں اور دوستوں کے وزٹ ویزہ کیلئے اسپانسر کی کم از کم آمدنی 15 ہزار درہم ماہانہ مقرر کی گئی ہے ۔ کاروباری افراد کیلئے بزنس ویزہ مالی ثبوت فراہم کرنے پر دیا جائے گا، جبکہ بیرون ملک رجسٹرڈ کمپنی رکھنے والوں کو بھی بزنس ویزہ جاری ہوگا۔
