فرائض کی انجام دہی میں غفلت و لاپرواہی ، 5 پولیس اہلکار معطل
پرتاپ گڑھ: اترپردیش کے ضلع پرتاپ گڑھ میں زہریلی شراب پینے سے ایک خاتون سمیت چار افراد کی موت ہوگئی ہے ۔سپرنٹنڈنٹ آف پولیس دفتر سے جاری پریس ریلیز کے مطابق کل رات سے سنگرام گڑھ علاقے کے منوہر پور رام پور ڈابی میں ایک خاتون سنیتا سروج کی سی ایچ سی سنگرام گڑھ میں علاج کے دوران موت ہونے کی اطلاع ملی۔ پولیس موقع پر پہنچی تو معلوم ہوا کہ خاتون بیمار تھیں جس کی علاج کے دوران موت ہوئی ہے ۔ نعش کو پوسٹ مارٹم کے لئے بھیجا گیا ہے ۔ اسی ضمن میں متوفی کے والد جواہر لال و گاوں کے دیگر 02افراد وجے کمار اور رام پرساد کی بھی موت ہوگئی۔پورے معاملے کی جانچ میں پتہ چلا کہ ان سبھی نے 13مارچ کو شراب پی تھی اوراس کے بعد ہی بیمار ہوگئے ۔انسپکٹر جنرل آف پولیس پریاگ راج کویندر پرتاپ سنگھ و انچار سپرنٹنڈنٹ آف پولیس پرتاپ گڑھ، اڈیشنل سپرنٹنڈنٹ آف پولیس مشرقی سریندر پرساد دویدی نے موقع واردات کا جائزہ لیا اورڈیوٹی پر غفلت و لاپرواہی کیلئے پانچ پولیس اہلکاروں کو معطل کردیا گیاجبکہ شراب فروش کے بھائی اور اس کی بیوی کو گرفتار کرلیا گیا ہے ۔
