مہنگائی، بے روزگاری اور بدعنوانی پر مرکزی حکومت کے پاس کوئی جواب نہیں
لکھنؤ: سماج وادی پارٹی (ایس پی) سربراہ و سابق وزیر اعلی اکھلیش یادو بنیادی مسائل سے عوام کی توجہ ہٹانے کے لئے حکمراں جماعت پر یکساں سول کوڈ کا شگوفہ پھونکنے کا الزام لگاتے ہوئے کہا کہ بی جے پی حکومت کے پاس بڑھتی مہنگائی، بے روزگاری اور بدعنوانی پر جواب نہیں ہے اس لئے وہ یکساں سیول کوڈ کی بات کر رہی ہے۔ایس پی سربراہ آج اسٹیٹ ہیڈکوارٹر لکھنؤ میں ڈاکٹر رام منوہر لوہیا آڈیٹوریم میں کمیرا چیتنا فاونڈیشن کے ذریعہ ذات پر مبنی مردم شماری کی ضرورت پر منعقد سیمنار سے خطاب کر رہے تھے۔ اس دوران انہوں نے ڈاکٹر سونے لال پٹیل کو خراج عقیدت پیش کیا اور کہا کہ بہوجن سماج کے لئے دلتوں، پچھڑوں، کمیرا سماج کے لئے جدوجہد کی۔ ان کے راستے پر چل کر اور حق و احترام کے لئے پرعزم ہوکر ہم ان کے خوابوں کو پورا کرسکتے ہیں۔ریاستی حکومت کے ترقی کے دعووں کو ہدف تنقید بناتے ہوئے یادو نے کہا کہ بی جے پی حکومت میں جو مفاہمتی خطوط پر دستخط ہوئے تھے وہ زمین پر نہیں اترے۔ اعداد بتاتے ہیں کہ جہاں سماج وادی پارٹی حکومت میں اوسط سالانہ ترقی کی شرح 6.2 فیصد بتائی گئی وہیں بی جے پی حکومت میں یہ 3.2 فیصد پر ٹک گیا۔ بی جے پی اقتدار میں نہ تو نئی انڈسٹریاں لگائی گئیں اور نہ ہی غریبوں کے گھر خوشحالی آئی ہے۔ مینوفیکچرنگ کے بس سپنے ہی دکھائے گئے۔سابق وزیر اعلی نے کہا کہ بی جے پی کے دور حکومت میں کسانوں کی آمدنی دو گنی ہونے کے بجائے کسانوں کے مسائل میں مزید اضافہ ہوا ہے۔ کسانوں کے بنیاد مسائل پر بات نہیں ہو رہی ہے۔ آلو اور دھان برباد ہوگیا۔ بی جے پی حکومت نے گیہوں کی خرید نہ کر کے پرائیویٹ کمپنیوں کو فروخت کر دیا ہے۔ بی جے پی کو محض اقتدار کا لالچی قرار دیتے ہوئے انہوں نے کہا کہ وہ پچھڑوں، دلتوں، اقلیتوں کا حق چھین کر اقتدار پر قابض رہنا چاہتی ہے۔ بی جے پی ملک کو پیچھے لے جا رہی ہے۔ اکھلیش نے کہا کہ سماج وادی پارٹی (ایس پی) یکساں سیول کوڈ کے خلاف ہے۔اکھلیش نے ذات پر مبنی مردم شماری کی اہمیت کو اجاگر کرتے ہوئے کہا کہ جب تک سبھی ذاتوں کو شمار نہیں کیا جائے گا تب تک ان کی شراکت داری کیسے طے ہوگی۔ سب کا ساتھ سب کا وکاس بغیر کیسے ہوسکتا ہے۔ پچھڑا، دلت، اقلیت (پی ڈی اے) اتحاد کے سامنے این ڈی اے مقابلہ نہیں کرسکتا۔ بی جے پی جھوٹے نعروں سے گمراہ کرتی ہے۔یکساں سیول کوڈ پر کئی اپوزیشن جماعتوں نے مرکزی کی بی جے پی حکومت کو نشانہ بنایا ہے۔