بشمول تلنگانہ و آندھراپردیش کئی ریاستوں کے 169 مقامات پر سی بی آئی کے دھاوے
نئی دہلی5نومبر (سیاست ڈاٹ کام ) مرکزی تفتیشی بیورو (سی بی آئی) نے ملک کے 15 بنکوں میں سات ہزار کروڑ روپے سے زائدکے دھوکہ دہی معاملہ میں آج دہلی، چنڈی گڑھ، اتر پردیش، مدھیہ پردیش اور گجرات سمیت ملک کی مختلف ریاستوں میں 169 مقامات پر چھاپے مارے ۔ذرائع کے مطابق آندھراپردیش بینک، اورینٹل بینک آف کامرس، انڈین اوورسیز بینک، بھارتی اسٹیٹ بینک، الہ آباد بینک، کینرا بینک، دینا بینک، پنجاب اور سندھ بینک، پنجاب نیشنل بینک، سنٹرل بینک آف انڈیا، یونین بینک آف انڈیا، بینک آف بڈودا ، آئی ڈی بی آئی بینک، بینک آف مہاراشٹر اور بینک آف انڈیا سے متعلق دھوکہ دہی کے درج کئے گئے 35 معاملات میں یہ چھاپے ماري کی گئی۔ بیورو سے موصولہ اطلاعات کے مطابق ملک بھر میں 169 مقامات پر چھاپے مارے گئے ۔ دہلی، گروگرام، چندی گڑھ، لدھیانہ، دہرادون، نوئیڈا، بارامتی، ممبئی، تھانے ، سلواسا، کلیان ، امرتسر، فرید آباد، بنگلور، تری پور، چنئی، مدورے ، کیولون، کوچین، بھاونگر، سورت، احمد آباد، کانپور، غازی آباد، وارانسی، چندولی، بھٹنڈا، گرداس پور، مرینا،کولکتہ، پٹنہ، کرشنا ، حیدرآباد، گجرات، ہریانہ، کرناٹک، کیرالہ، مدھیہ پردیش، مہاراشٹر، پنجاب، تمل ناڈو، تلنگانہ، اتر پردیش، اتراکھنڈ ، دادرا اور نگر حویلی میں کئی مقامات پر چھاپے مارے گئے ہیں۔چھاپہ ماری میں سی بی آئی کی تقریباً 170 ٹیمیں شامل ہیں جن میں ماہر مالیات، آڈیٹر اور افسران بھی شامل ہیں۔واضح رہے کہ سال 19 ۔2018میں بینک گھپلہ معاملے میں تقریباً 6800 معاملے درج کئے تھے اور 71 ہزار 500 کروڑ روپے کی دھوکہ دہی سامنے آئی تھی۔ذرائع نے بتا یا کہ پیر کو سینئر عہدیداروں کا ایک اعلی سطحی اجلاس منعقد ہوا جس میں بنک دھوکہ دہی کے سلسلہ میں ملک کے 35مقامات پر منگل کی صبح تلاشی لینے سے متعلق کاروائی کا فیصلہ کیا گیا ۔ نیرومودی اور مہیوال چوکسی کی جانب سے 13ہزار کروڑروپئے کی دھوکہ دہی جس میں پنجاب نیشنل بنک شامل ہے سنٹرل بیورو آف انوسٹی کیشن کو بنکوں کو دھوکہ دینے والوں کے خلاف سخت کاروائی کرنے کی مرکزی حکومت کی جانب سے ہدایت دی گئی ہے ۔جاریہ سال جولائی میں مختلف بنکوں کی جانب سے شکایتوں کی وصولی کے بعد سی بی آئی نے بارہ ریاستوں اور مرکز کے زیر انتظام علاقوں کے 192مقامات پردھاوے کئے تھے اور اسکام کے 42 نئے مقدمے درج کئے۔ اسکامس کی مالیت 7200کروڑ روپئے ہوتی ہے۔