اسلام آباد: بین الاقوامی مالیاتی فنڈ(آئی ایم ایف)نے کوویڈ19 سے نمٹنے کیلئے پاکستان کے اقدامات کو سراہتے ہوئے کہا ہیکہ 2021ء میں پاکستان کی معیشت کی مرحلہ وار بحالی متوقع ہے۔تفصیلات کے مطابق بین الاقوامی مالیاتی فنڈکی جانب سے ’’پالیسی ٹریکر‘‘ کے عنوان سے جاری کردہ رپورٹ میں کہا گیا ہیکہ جون 2020 میں پاکستان میں وائرس کے پھیلاؤ کی یومیہ شرح 6 ہزار کیسز کی بلند ترین سطح پر تھی تاہم وفاقی اور صوبائی حکومتوں نے تمام ضروری اقدامات کیے جس کے نتیجہ میں جولائی سے نئے کیسوں کی تعداد میں کمی آنا شروع ہوگئی ۔ رپورٹ کے مطابق اگست و ستمبرمیں یومیہ کیسوں کی تعداد ایک ہزار سے کم ہوگئی اورنومبر کے وسط سے کورونا کے مثبت کیسوں کی تعداد میں دوبارہ اضافے کا رجحا ن شروع ہوا جو اب تک جاری ہے۔عالمی ادارے کی رپورٹ میں کہا گیا ہیکہ مالی سال 2020 کیلئے پاکستان کی اقتصادی نمو کا اندازہ منفی 0.4 فی صد لگایا گیا تھا تاہم مالی سال 2021 میں پاکستان کی معیشت کے مرحلہ وار بحالی کی راہ پر گامزن ہونے کی توقع ہے۔
