کورونا کے یومیہ کیسوں میں پھر اضافہ
نئی دہلی : ملک میں کوروناوائرس (کووڈ ۔19) کے یومیہ کیسزمیں ایک بار پھر اضافہ دیکھنے میں آیا ہے اور گزشتہ 24 گھنٹوں کے دوران اس موذی وبا کے 2.76 لاکھ سے زیادہ نئے کیسز رپورٹ ہوئے ہیں ، تاہم اسی عرصہ کے دوران دوران 3.69 لاکھ سے زائد مریضوں نے اس جان لیوا وائرس کو شکست دی ہے ۔ جبکہ تقریبا چارہزار لوگوں کی ہلاکت کی اطلاع ہے ۔ دریں اثنا ملک میں 11 لاکھ 66 ہزار 90 افراد کو کورونا کی ویکسین دی گئی۔ اس طرح ملک میں اب تک 18 کروڑ 70 لاکھ نو ہزار 792 افراد کو کورونا وائرس ویکسین لگائے جا چکے ہیں۔جمعرات کی صبح مرکزی وزارت صحت کی جانب سے جاری تازہ ترین اعداد و شمار کے مطابق گذشتہ 24 گھنٹوں میں 2,76,070 نئے کیسز کی رپورٹ کے ساتھ کورونا متاثرین کی مجموعی تعداد دو کروڑ 57 لاکھ 72 ہزار 400 ہوگئی۔ اسی عرصے کے دوران تین لاکھ 69 ہزار 77 مریض صحت مند بھی ہوئے جس کے بعد اب تک 2,23,55,440 مریض شفایاب ہو چکے ہیں۔ اس طرح ملک میں کورونا سے شفایابی کی شرح 86.74 فیصد ہوگئی ہے ۔اسی مدت کے دوران ایکٹیو کیسز میں 96,841 کی کمی سے یہ تعداد 31 لاکھ 29 ہزار 878 رہ گئی ہے ۔ گزشتہ24گھنٹوں کے دوران ملک میں مزید 3،874 مریض اپنی جانوں سے ہاتھ دھو بیٹھے جس سے ہلاک شدگان کی مجموعی تعداد 2،87،122 ہوگئی۔ملک میں ایکٹیو کیسز کی شرح گھٹ کر 12.14 فیصد رہ گئی ہے ، جبکہ اموات کی شرح اب بھی 1.11 فیصد ہے ۔ریاست مہاراشٹر میں ایکٹیو کیسزکی تعداد 18020 سے گھٹ کر 404229 رہ گئی ہے ۔ اسی عرصے کے دوران 51،457 مزید مریضوں کی شفایابی سے صحت مند مریضوں کی مجموعی تعداد 4978937 ہوگئی ہے ، جبکہ مزید 594 مریضوں کی ہلاکت کے ساتھ ہی اموات کی مجموعی تعداد بڑھ کر 84371 ہوگئی ہے۔