برلن : حکومت نے کہا ہیکہ افغانستان میں طالبان کی جانب سے کنٹرول سنبھالے جانے کے بعد وہاں سے نکالے گئے 2600 متاثرہ ترین افغان شہریوں کو جرمنی میں رہنے کیلئے عارضی رہائشی اجازت نامے جاری کیے جائیں گے۔جرمن وزارت خارجہ کی خاتون ترجمان کے مطابق ویزوں کے اجراء کی فہرست میں ایسے افغان شہری شامل کیے گئے ہیں، جن کی حفاظت کی جرمنی پر خاص طور سے ذمہ داری عائد ہوتی ہے۔برلن حکومت کے مطابق انسانی حقوق کے کارکنان، صحافی، فنکاروں کیساتھ ساتھ سائنسدان اور سول سوسائٹی کے ممبران کا شمار ایسے متاثرہ گروپ میں ہوتا ہے، جن کی جانوں کو طالبان کے دور حکومت میں خطرات لاحق ہو سکتے ہیں۔ جیسے ہی افغان طالبان نے کابل کا محاصرہ کیا، شہر میں واقع امریکی سفارتخانے سے اس کا عملہ نکال لیا گیا۔ جرمنی نے بھی انخلا کے اس مشن کیلئے ہیلی کاپٹر اور چھوٹے طیارے روانہ کیے تھے۔ اس کے علاوہ کابل پر طالبان کے قبضے سے قبل جرمن کمپنیوں کے افغان ملازمین اور مقامی تنظیمیں بھی اس فہرست میں شامل کی گئی ہیں۔ جرمن حکومت کے مطابق ان عارضی رہائشی اجازت ناموں کی مدت تین سال تک محدود ہو گی اور وصول کنندگان کے خاندان اور بچوں کو بھی یہ ویزے جاری کیے جائیں گے۔ مذکورہ افغان باشندوں کو جرمنی میں پناہ کی درخواست جمع کرانے کی بھی ضرورت نہیں ہو گی۔ تاہم رہائشی اجازت نامہ حاصل کرنے سے پہلے اس فہرست کیلئے منتخب کیے گئے تمام افراد کی سکیورٹی کلیئرنس ضروری ہو گی۔
