دبئی ۔9 جولائی (سیاست ڈاٹ کام )کرکٹ ورلڈ کپ میں ویسٹ انڈیز کی ٹیم خاطر خواہ مظاہرہ نہ کر سکی اور صرف دو میچ جیتنے میں کامیاب رہی لیکن اپنی جارحانہ بیٹنگ کے لیے مشہورٹیم کے بیٹسمینوں نے ٹورنمنٹ میں سب سے لمبے چھکے لگانے کا اعزاز حاصل کرلیا۔ورلڈ کپ کے دوران تمام 10 ٹیموں کے بیٹسمینوں نے اپنی اپنی بیٹنگ کے جوہر دکھائے لیکن جارحانہ اور لمبے چھکے لگانے میں کوئی بھی ٹیم ویسٹ انڈیز کا مقابلہ نہ کر سکی۔ ورلڈکپ میں اب تک لگائے گئے 5 بڑے چھکوں کی فہرست میں پہلے پانچ میں سے چار بڑے چھکے ویسٹ انڈیز کے کھلاڑیوں نے لگائے۔اس فہرست میں پانچویں نمبر پر کرس گیل موجود ہیں جنہوں نے نیوزی لینڈ کے خلاف 98 میٹرس کا چھکا لگایا تھا جبکہ چوتھے نمبر پر موجود محموداللہ ریاض نے بھی آسٹریلیائی بولر پیٹ کمنز کے خلاف 98 میٹرس کا ہی چھکا لگایا۔ویسٹ انڈیز کے آندرے رسل تیسرے نمبر پر موجود ہیں جنہوں نے آسٹریلیا کے خلاف 103 میٹرس طویل چھکا لگایا جبکہ شیمرون ہٹمائر کی جانب سے بنگلہ دیش کے خلاف مارا گیا چھکا 104میٹر طویل تھا۔ ورلڈ کپ میں اب تک سب سے لمبا چھکا لگانے کا ریکارڈ ویسٹ انڈیز کے کپتان جیسن ہولڈر کے پاس ہے جنہوں نے اپنے بنگلہ دیشی ہم منصب کو 105میٹرس طویل چھکا رسید کیا اور ایونٹ میں سب طویل چھکا لگانے کا اعزاز حاصل کیا۔
