جکارتہ :3ڈسمبر ( ایجنسیز ) ملائیشیا کے حکام نے 11 برس قبل دوران پرواز پراسرار طور پر غائب ہو جانے والے طیارے کی تلاش کا کام ایک بار پھر شروع کرنے کا اعلان کیا ہے۔برطانوی خبر رساں ادارے روئٹرز کے مطابق ملائیشین ٹرانسپورٹ وزارت کی جانب سے بتایا گیا ہے کہ تلاش کا کام 30 دسمبر سے شروع کیا جائے گا۔ملائیشین ایئرلائنز کی پرواز ایم ایچ 370 کا بوئنگ 777 طیارہ، جس میں 227 مسافر اور عملے کے 12 ارکان سوار تھے، 8 مارچ 2014 کو کوالالمپور سے بیجنگ جاتے ہوئے غائب ہو گیا تھا۔اس کو ہوا بازی سے متعلق پراسرار ترین واقعات میں سے ایک سمجھا جاتا ہے۔جہاز کے غائب ہونے کے بعد اس کو کئی روز تک تلاش کیا جاتا رہا مگر کوئی نام و نشان نہ ملا، پھر کچھ عرصہ بعد تلاش کا کام بند کر دیا گیا تھا تاہم اس کے بعد بھی کئی بار اس کی تلاش دوبارہ شروع کیے جانے کے اعلانات ہو چکے ہیں۔اس ضمن میں تازہ ترین اور آخری کارروائی بحر ہند کے جنوبی حصے میں کی گئی تاہم اس کو خراب موسمی صورت حال کی وجہ سے اپریل میں ختم کر دیا گیا تھا۔اب ایک بار پھر ملائیشین وزیر ٹرانسپورٹ انتھونی لوک کا کہنا ہے کہ ایکسپوریشن فرم اوشن انفینیٹی سمندر کی تہوں کا جائزہ لینے کا کام شروع کر رہی یہ تلاش 55 روز پر مشتمل ہے مختلف وقفوں سے سمندر کے مختلف مقامات کو چیک کیا جائے گا۔بیان کے مطابق ’تلاش کے کام میں ان مقامات کو چیک کیا جائے گا جہاں اس کی موجودگی کے امکانات ہو سکتے ہیں۔‘بیان میں تلاش کے لیے کسی خاص مقام کے تعین کا تذکرہ نہیں کیا گیا۔
