ریاض، 10 نومبر (ایجنسیز) ورلڈ ایڈاپشن ڈے کے موقع پر سعودی قومی فوسٹرکیئر اسوسی ایشن نے اعلان کیا کہ سعودی عرب میں 11 ہزار سے زیادہ خاندانوں نے یتیم بچوں کی کفالت کی ذمہ داری قبول کر چکے ہیں۔ سعودی پریس ایجنسی کے مطابق یہ اعداد و شمار الوداد چیریٹی اسوسی ایشن نے جاری کیے، جو مملکت کی وزارتِ افرادی قوت و سماجی ترقی کی جانب سے نامعلوم والدین کے یتیم بچوں کی قومی کفالت کے پروگرام کی نگرانی کا واحد مجاز ادارہ ہے۔ اسوسی ایشن نے ایک نئی آگاہی مہم بھی شروع کی ہے جس میں کفیل والدین اور بچوں کی جذباتی اور دل کو چھو لینے والی کہانیوں کو اجاگرکیا گیا ہے۔ ادارے کی جانب سے ایک ویڈیو میں، ایک خاتون کفیل والدہ نے اپنے بچے کے بارے میں کہا جب وہ مجھے گلے لگاتی ہے تو ایسا لگتا ہے جیسے وہ میرے دل کوگلے لگا رہی ہو۔ ایک اور والدین نے بتایا میں اپنی زندگی میں کبھی اتنا خوش نہیں ہوا جتنا اس لفظ نے مجھے خوش کیا’’ماما ‘‘۔ کفالت اختیار کرنے والے ایک والد نے اس تجربے کو اپنی زندگی کا سب سے خوبصورت احساس قرار دیا۔ ایک اور نے کہا ہم الوداد اسوسی ایشن کے شکر گزار ہیں کہ اس نے ہمیں یہ موقع دیا۔ ادارے کے سی ای او ضیف اللہ النامی نے بتایا کہ یہ مہم سماج میں کفالت کے تصورکو فروغ دینے اور اس کی قبولیت بڑھانے کی کوششوں کا تسلسل ہے، تاکہ خاندان اور بچے کے درمیان محبت، وابستگی اور تعلق کے جذبے کو اجاگرکیا جا سکے۔ ایس پی اے نے اسلام میں یتیم کی کفالت کی اہمیت بھی بیان کی اور نبی کریم ﷺ کی حدیث کا حوالہ دیا: میں اور یتیم کی کفالت کرنے والا جنت میں اس طرح ہوں گے اور آپ ﷺ نے شہادت اور بیچ کی انگلی کو ملا کر دکھایا۔ الوداد اسوسی ایشن نہ صرف آگاہی پھیلاتی ہے بلکہ یتیم بچوں اور ان کی کفالت کرنے والے خاندانوں کے لیے سماجی، نفسیاتی اور تعلیمی مشاورت سمیت مختلف خدمات بھی فراہم کرتی ہے، تاکہ وہ بچوں کی پوری زندگی بہتر دیکھ بھال کر سکیں۔ یہ ادارہ یتیم بچوں کے لیے عارضی رہائش بھی فراہم کرتا ہے اورکفیل خاندانوں کو رضاعت کے سلسلے میں معاونت بھی دیتا ہے۔
