دیوالی پر مسافروں کو بے حال دیکھ کر کانگریس کا وزیر ریلوے سے سوال
نئی دہلی ۔20؍اکتوبر( ایجنسیز )دیوالی اور چھٹ جیسے بڑے تہوار کے موقع پر ٹرینوں میں ٹکٹوں کی شدید قلت ہوتی ہے۔ ان اوقات میں مسافروں کی پریشانی کو دیکھتے ہوئے خصوصی ٹرینیں چلائی جاتی ہیں اور اس بار بھی دیوالی کے پیش نظر تقریباً 12 ہزار خصوصی ٹرینیں چلائے جانے کا اعلان مرکزی وزیر ریلوے اشونی ویشنو نے کیا ہے لیکن اسٹیشنوں پر لوگوں کی بھیڑ کسی صورت کم ہوتی ہوئی دکھائی نہیں دے رہی ہے جس پر کانگریس نے مودی حکومت کے سامنے تلخ سوال رکھ دیا ہے۔ کانگریس نے اپنے ’ایکس‘ ہینڈل سے ایک پوسٹ کرتے ہوئے وزیر ریلوے سے سوال پوچھا ہے کہ آخر وہ 12 ہزار اسپیشل ٹرینیں کہاں چلا رہے ہیں، عوام تو ٹکٹ کیلئے پریشان دکھائی دے رہی ہے؟کانگریس نے لکھا ہے کہ ’’ریل منتری جی، 12 ہزار اسپیشل ٹرینیں زمین کے کس حصے میں چلوا رہے ہیں؟ عوام پریشان ہے اور آپ اپنی دنیا میں مست۔ پتہ تھا کہ دیوالی اور چھٹ میں لوگ گھر جائیں گے اس کے باوجود بھی انتظام کیوں نہیں کیا گیا؟ اب عوام مسئلہ بیان کر رہی ہے تو آپ ایف آئی آر کرنے کی دھمکی دے رہے ہیں۔ شرم آنی چاہیے‘‘۔ کانگریس کی یہ پوسٹ ایسے وقت میں سامنے آئی ہے جب شمالی ہند کی الگ الگ ریاستوں جیسیً بہار، اُتر پردیش، جھارکھنڈ اور مغربی بنگال کے ہزاروں مسافر تہواروں پر گھر جانے کیلئے ٹرین ٹکٹ نہیں ملنے کی شکایت کر رہے ہیں۔سوشل میڈیا پر لگاتار ویڈیو اور تصویریں سامنے آ رہی ہیں، جن میں ریلوے اسٹیشنوں پر مسافروں کی بھیڑ دیکھی جا سکتی ہے۔ جو ٹرینیں چل رہی ہیں، وہ پوری طرح سے بھری ہوئی ہیں۔ لوگ گھنٹوں کھڑے ہو کر سفر کرنے پر مجبور ہیں۔ کئی مقامات پر مسافروں نے کہا کہ انھیں کنفرم ٹکٹ نہیں مل پا رہا ہے اور ویٹنگ لسٹ 300 سے اوپر تک پہنچ چکی ہے۔کانگریس نے وزیر ریل کو ‘Reel Mantri’ کہتے ہوئے طنز کیا ہے۔ پارٹی نے سوشل میڈیا پوسٹ میں ’ایف آئی آر کی دھمکی‘ کا جو ذکر کیا ہے، وہ حال ہی میں وزیر ریلوے کے اس بیان سے جڑا ہے جس میں انھوں نے کہا تھا کہ ’’فرضی جانکاری یا افواہ پھیلانے والوں کے خلاف سخت کارروائی کی جائے گی‘‘۔ اس تعلق سے اپوزیشن پارٹی نے الزام عائد کیا کہ حکومت عوام کی شکایتیں دبانے کی کوشش کر رہی ہے۔