بی جے پی وبی جے ڈی ملک و ریاست کیلئے نقصاندہ ‘ اوڈیشہ میں کھر گے کی پریس کانفرنس
بھونیشور:کانگریس کے قومی صدر ملکارجن کھرگے نے آج ایک بار پھر اس بات کا اعادہ کیا ہے کہ مرکز میں بی جے پی کی حکومت نہیں بنے گی بلکہ انڈیا الائنس مکمل اکثریت کے ساتھ حکومت بنائے گی۔ اوڈیشہ کے بھونیشور میں ایک پریس کانفرنس سے خطاب کرتے ہوئے انہوں نے بی جے پی وبی جے ڈی پر براہ راست تنقید کی اور ان دنوں کو ملک و ریاست کیلئے نقصاندہ بتایا۔کانگریس کے قومی صدر نے کہا کہ نوین پٹنائک گزشتہ 24 سالوں سے اوڈیشہ کے وزیر اعلیٰ ہیں اور وزیر اعظم نریندر مودی گزشتہ دس سالوں سے ان کی حمایت کر رہے ہیں۔ ان دونوں نے درپردہ متحد ہوکر ایک دوسرے کی حکومتوں کو مدد کرنے کی جو کوشش کی اس کا فائدہ عوام کو نہیں ہوا۔ ہم نے سوچا کہ وہ اوڈیشہ کی بہتری کے لیے ایک ساتھ کھڑے ہیں لیکن ہماری سوچ غلط تھی۔ اب بی جے پی اور بی جے ڈی میں جس طرح عوامی لڑائی چل رہی ہے وہ اوڈیشہ کے لیے قطعاً مناسب نہیں ہے۔ملکارجن کھرگے نے کہا کہ اوڈیشہ میں بہت سارے قدرتی وسائل ہیں جو بڑی بڑی فیکٹریوں میں استعمال ہوتے ہیں۔ یہاں کے وسائل سے باہر کی فیکٹریوں میں روزگار کے مواقع پیدا ہوتے ہیں لیکن یہاں کے لوگوں کو کچھ نہیں ملتا۔ اگر اس صورتحال کو بدلنا ہے تو ریاستی اور مرکزی دونوں حکومتوں کو بدلنا ہوگا۔ کانگریس کے قومی صدر نے کہا کہ اوڈیشہ حکومت چٹ فنڈ اور کان کنی گھوٹالوں کی وجہ سے ایک بدعنوان حکومت کے طور پر جانی جاتی ہے۔ اس لیے اس بار بی جے ڈی کو موقع نہیں ملے گا۔ اوڈیشہ میں مہنگائی اور بہت بے روزگاری ہے۔ آئی ایل او کی رپورٹ کے مطابق اوڈیشہ میں 41 فیصد بے روزگاری ہے لیکن اوڈیشہ حکومت نے اس پر کوئی توجہ نہیں دی ہے۔ اڈیشہ کو برباد کرنے میں بی جے پی اور بی جے ڈی کا برابر کا حصہ ہے۔ اوڈیشہ میں کانگریس پارٹی مضبوط پوزیشن میں ہے اور کانگریس ریاست کے لوگوں کو انصاف دلائے گی۔ملکارجن کھرگے نے کہا کہ کانگریس نے لوک سبھا انتخابات کے لئے پانچ انصاف اور 25 گارنٹیاں پیش کی ہیں۔ کانگریس نے نوجوانوں کے انصاف، خواتین کے انصاف، کسانوں کے انصاف، مزدوروں کے انصاف اور حصہ داری کی گارنٹیاں دی ہیں۔ جب مرکز میں انڈیا الائنس حکومت برسراقتدار آئے گی تو غریبوں کو دس کلو مفت راشن دیا جائے گا اور تمام گارنٹیاں پوری کی جائیں گی۔