نئی دہلی: ہندوستان نے کینیڈا میں خالصتانی دہشت گرد ارش سنگھ گل عرف ارش دلّا کی حوالگی کی درخواست کرنے کا فیصلہ کیا ہے ۔وزارت خارجہ کے ترجمان رندھیر جیسوال نے ارش دلّا کی گرفتاری کی خبروں پر میڈیا کے سوالات کے جواب میں کہا کہ ہم نے مجرم ارش سنگھ گل عرف ارش دلا کی کینیڈا میں گرفتاری پر 10 نومبر سے نشر ہونے والی میڈیا رپورٹس دیکھی ہیں۔ کینیڈائی پرنٹ اور ویژول میڈیا نے اس گرفتاری کے بارے میں بڑے پیمانے پر رپورٹ دی ہے ۔ ہم سمجھتے ہیں کہ اونٹاریو کی عدالت نے معاملے کی سماعت کے لئے مقدمہ درج کر دیا ہے ۔ ارش دلا کوقتل، قتل کی کوشش‘ دہشت گردی کی کارروائیوں کے 50 سے زائد مقدمات میں مجرم قرار دیا گیا۔ مئی 2022 میں اس کے خلاف ریڈ کارنر نوٹس جاری کیا گیا تھا۔ اسے 2023 میں ہندوستان میں ایک انفرادی دہشت گرد کے طور پر نامزد کیا گیا تھا۔ جیسوال نے کہا کہجولائی 2023 میں، حکومت ہند نے کینیڈا کی حکومت سے ان کی عارضی گرفتاری کی درخواست کی تھی لیکن اسے مسترد کر دیا گیا تھا۔ اس معاملے میں اضافی معلومات تمام کینیڈین حکام کو فراہم کی گئی تھیں۔ ترجمان نے کہا کہ حالیہ گرفتاریوں کے پیش نظر، ہماری ایجنسیاں حوالگی کی درخواست پر کارروائی کریں گی۔ارش دلا کے ہندوستان میں مجرمانہ ریکارڈ اور کینیڈا میں اسی طرح کی غیر قانونی سرگرمیوں میں اس کے ملوث ہونے کے پیش نظر، یہ توقع کی جاتی ہے کہ اسے ہندوستان میں انصاف کا سامنا کرنے کیلئے حوالگی یا ملک بدر کر دیا جائے گا۔