اسلام آباد: پاکستان کے قومی احتساب بیورو (نیب) نے نیشنل کرائم ایجنسی برطانیہ سے 190 ملین پاؤنڈ اسکینڈل میں سابق وزیراعظم عمران خان کو 23 مئی کو دوبارہ طلب کرلیا ہے۔ نیب ذرائع کے مطابق عمران خان کو منگل کو 10بجے دن نیب میں طلب کیا گیا۔ انہیں 18مئی کو طلب کیا گیا تھا لیکن وہ پیش نہیں ہوئے۔ نیب کی ٹیم عمران خان کو نوٹس وصول کروانے پہنچی لیکن نیب کی 2 رکنی ٹیم عمران خان کے وکیل کی غیرموجودگی کے باعث نوٹس حوالے کئے بغیر واپس ہوگئی۔ لاہور کے زمان پارک کی سکیورٹی ٹیم نے نیب ٹیم کو جواب دیا کہ نیب کی ٹیم عمران خان کے وکیل سے رابطہ کرے۔ گزشتہ دنوں نیب نے عمران کو اسی کیس میں گرفتار کیا تھا جس کے بعد ملک میں پرتشدد احتجاج ہوا اور فوجی تنصیبات و مقامات پر حملے ہوئے تھے۔ تاہم سپریم کورٹ نے عمران خان کی گرفتاری کو غیر قانونی قرار دیتے ہوئے ان کو رہا کرنے کا حکم دیا تھا۔ پاکستان تحریک انصاف کے سربراہ کی رہائی عمل میں آئی۔
