اسلام آباد، 23 جولائی (یو این آئی) ماہرین فلکیات نے 2 اگست کو سورج گرہن میں چھ منٹ کے لئے دنیا کے اندھیرے میں ڈوبنے کی خبروں کی اصل حقیقت بتادی۔حال ہی میں سوشل میڈیا پر ایک غیر معمولی سورج گرہن سے متعلق خبریں تیزی سے وائرل ہو رہی ہیں، جس میں دعویٰ کیا جا رہا ہے کہ 2 اگست کو چھ منٹ کے لئے دنیا اندھیرے میں ڈوب جائے گی۔ماہرین فلکیات نے ان خبروں کو افواہ قرار دیتے ہوئے حقیقت واضح کر دی ہے ، فلکیات کے ماہرین نے ان قیاس آرائیوں پر ردعمل ظاہر کرتے ہوئے کہا ہے کہ 2 اگست 2025 کو کوئی سورج گرہن شیڈول نہیں ہے ، یہ تاریخ دراصل 2 اگست 2027 کے ایک اہم سورج گرہن سے غلطی سے منسلک ہو گئی ہے ، جو کہ واقعی ایک غیر معمولی فلکی مظہر ہوگا۔ماہرین فلکیات نے بتایا کہ اگرچہ 2 اگست 2025 کو کوئی گرہن نہیں ہوگا، لیکن 23 اگست 2025 کو ایک جزوی سورج گرہن کینیڈا، گرین لینڈ اور آرکٹک کے کچھ علاقوں سے دیکھا جا سکے گا۔ماہرین فلکیات کا کہنا تھا کہ سورج گرہن کی اصل تاریخ 2 اگست 2027 ہے ، جسے صدی کا ایک شاندار اور طویل ترین سورج گرہن قرار دیا جا رہا ہے ۔
یہ مکمل سورج گرہن 6 منٹ اور 23 سیکنڈز تک جاری رہے گا، جو عام سورج گرہنوں کے مقابلے میں دوگنی مدت کا ہوگا۔
