حیدرآباد 27 نومبر(سیاست نیوز) دونوں شہروں میں جاریہ ہفتہ کے اواخر بارش کا امکان ہے ۔ محکمہ موسمیات نے کہا کہ کہ بیشتر اضلاع میں 29 اور30 نومبر و یکم ڈسمبر کو بھی بارش کا امکان ہے۔ موسم میں آئندہ دو یوم میں تبدیلی پر حکام نے بتایا کہ رات میں درجہ حرارت میں گرواٹ کا سلسلہ آئندہ دو یوم کے بعد بند ہوجائے گا اور بارشوں کا سلسلہ بند ہونے کے بعد دوبارہ سردی کی لہر ریکارڈ کی جائیگی۔ خلیج بنگال میں طوفان ’سینیار‘ کے رخ میں تبدیلی سے ٹاملناڈو میں بارشوں کا سلسلہ جاری ہے لیکن تلنگانہ کے بیشتر اضلاع میں بارش کے امکانات تھے ۔ دو یوم قبل کئی اضلاع میں بارش ہوئی لیکن حیدرآباد و سکندرآباد میں بارش نہیں ہوئی تھی ۔ محکمہ موسمیات کے ماہرین کا کہناہے کہ آئندہ 48 گھنٹوں میں شہر میں بارشوں کا سلسلہ شروع ہوجائے گا اور محکمہ موسمیات سے ’زرد الرٹ ‘ جاری کیا جاچکا ہے۔ ماہرین کے مطابق طوفان ’سینیار‘ کا رخ سری لنکا کی سمت بڑھ رہا ہے اسی لئے جنوبی ریاستوں میں اس کے اثرات محسوس کئے جا رہے ہیں جبکہ آندھرا بالخصوص ساحلی اضلاع میں بارش کے امکانات ہیں۔ شہر میں درجہ حرارت معمول کے مطابق رہنے لگا ہے اور کئی علاقوں میں دن میں درجہ حرارت 27 سے 30 ڈگری رہنے لگا ہے جبکہ رات میں درجہ حرارت 10تا12 ڈگری ریکارڈ کیا جانے لگا ہے۔3
