لاس اینجلس: ٹیٹو آرٹسٹس کی دنیا میں ایک لڑکی یونو (Yeono) کا نام کافی شہرت کا حامل ہوچکا ہے جس کی وجہ اس کے 3-Dٹیٹو ہیں۔میڈیا رپورٹس کے مطابق 28 سالہ یونو ایک انتہائی باصلاحیت ٹیٹو آرٹسٹ ہیں جو مائیکرو ریئلزم (چھوٹے سائز کی حقیقت پسندانہ تصاویر) بنانے میں مہارت رکھتی ہیں۔امریکی شہر لاس اینجلس میں یونو کا نام ٹیٹو آرٹسٹوں کی دنیا میں بڑا نام ہے۔ یونو جنوبی کوریا میں پیدا ہوئیں اور وہیں پلی بڑھیں تاہم ’سنہرے موقع‘ کی تلاش میں سبھی کی طرح وہ بھی امریکہ آگئیں۔یونو کو اپنے ٹیٹو بنانے کے شوق کا احساس تقریباً ایک دہائی قبل اس وقت ہوا جب ان کی والدہ نے خود کیلئے ٹیٹو بنوانے کا فیصلہ کیا اور ایک اچھے ٹیٹو آرٹسٹ کی تلاش میں اپنی بیٹی سے مدد مانگی۔یونو نے جاپانی ٹیٹوز کی دنیا کو کھنگال ڈالا اور اس دوران وہ اس پیچیدہ ہنر و فن کی دنیا کو دیکھ کر مبہوت رہ گئیں۔