نظام آباد۔ 29اکتوبر (سیاست ڈسٹرکٹ نیوز)محکمہ موسمیات نے آئندہ 48 گھنٹوں کے دوران تلنگانہ کے مختلف اضلاع میں شدید بارش، گرج چمک اور تیز ہوا کے امکانات ظاہر کیے ہیں۔ جاری کردہ تازہ پیش قیاسی کے مطابق ریاست کے شمالی اضلاع میں موسم غیر مستحکم رہنے کی توقع ہے۔نظام آباد کاما ریڈی کو ایلو زون قرار دیا گیا ہے محکمہ موسمیات، حیدرآباد کے مطابق 30؍اکتوبر کی صبح تا 31؍اکتوبر کی صبح کے درمیان جنگاؤں، ہنمکنڈہ اور ورنگل اضلاع میں انتہائی شدید تا بیحد شدید بارش کے ساتھ گرج چمک اور 40 تا 50 کلومیٹر فی گھنٹہ کی رفتار سے تیز ہوائیں چلنے کا امکان ہے۔ اسی دوران نظام آباد، کاماریڈی، کومرم بھیم آصف آباد، راجنا سرسلہ، یادادری بھونگیری، میدک اور سوریاپیٹ سمیت کئی شمالی اضلاع میں بھاری بارش کے امکانات ظاہر کیے گئے ہیں۔ عہدیداروں نے بتایا کہ بارش کے دوران کڑک، بجلی گرنے اور جھکڑوں کا بھی امکان ہے، اس لیے کسانوں، مویشی پالنے والوں اور شہری عوام کو مشورہ دیا گیا ہے کہ وہ کھلے میدانوں یا بجلی کے کھمبوں کے قریب پناہ لینے سے گریز کریں۔ محکمہ موسمیات نے ضلع انتظامیہ کو ہدایت دی ہے کہ وہ نچلے علاقوں میں پانی کی نکاسی کے مناسب انتظامات کریں اور کسی بھی ہنگامی صورتحال میں فوری امدادی کارروائیاں یقینی بنائیں۔واضح رہے کہ 31اکتوبر تا یکم نومبر کے دوران بھی نظام آباد، کاماریڈی، عادل آباد اور نرمل اضلاع میں وقفے وقفے سے ہلکی تا معتدل بارش یا گرج چمک کے امکانات رہیں گے۔ تاہم یکم نومبر کے بعد موسم میں بتدریج بہتری کی توقع ظاہر کی گئی ہے۔
