نئی دہلی :اتر پردیش، اتراکھنڈ، پنجاب، گوا اور منی پور اسمبلی انتخابات کے رجحانات اب نتائج میں تبدیل ہونے لگے ہیں۔ کانگریس کی کارکردگی پانچوں ریاستوں میں انتہائی خراب دیکھنے کو مل رہی ہے، خصوصاً اتر پردیش میں تو پارٹی کو پانچ سیٹ بھی حاصل ہوتی دکھائی نہیں پڑ رہی۔ ایسے حالات میں کانگریس کے سابق صدر راہول گاندھی کا رد عمل سامنے آیا ہے اور انھوں نے کانگریس کی شکست کا اعتراف کرتے ہوئے عوامی رائے کو قبول کرنے کی بات کہی ہے۔راہول گاندھی نے اس تعلق سے ایک ٹوئٹ کیا ہے جس میں انھوں نے لکھا ہے ’’مینڈیٹ حاصل کرنے والوں کو مبارکباد۔ میں سبھی کانگریس کارکنان اور والنٹیرس کو ان کی سخت محنت اور خودسپردگی کے لیے شکریہ ادا کرتا ہوں۔ ہم اس سے سیکھیں گے اور ہندوستان کے لوگوں کے مفادات کے لیے کام کرتے رہیں گے۔‘‘واضح رہے کہ جن پانچ ریاستوں میں آج ووٹوں کی گنتی ہو ئی ہے، ان میں سے کسی بھی ریاست میں کانگریس حکومت بنا نے کے موقف میں نظر نہیں آ رہی ہے۔ اتر پردیش میں تو حالات انتہائی دگر گوں ہیں جہاں شام 5 بجے تک پارٹی محض دو سیٹوں پر سبقت بنائے ہوئی تھی۔