نیویارک ۔ 24 جنوری (ایجنسیز) دنیا کے امیر ترین شخص ایلون مسک نے امریکی صدر ڈونالڈ ٹرمپ کے مجوزہ ’بورڈ آف پیس‘ پر دلچسپ انداز میں رائے کا اظہار کیا۔ عالمی میڈیا رپورٹ کے مطابق ورلڈ اکنامک فورم میں گفتگو کرتے ہوئے ایلون مسک نے کہا کہ جب انہوں نے ’پیس سمٹ‘ کے قیام کے بارے میں سنا تو انہیں لمحہ بھر کے لیے الجھن ہوئی کہ آخر کس پیس کی بات ہو رہی ہے، مجھے لگا یہاں ’Peace (امن)‘ کے بجائے ’Piece (ٹکڑے)‘ کی بات ہو رہی ہے۔ مسک نے ہنستے ہوئے کہا کہ مجھے ابتدا میں لگا شاید گرین لینڈ یا وینزویلا کے کسی چھوٹے حصہ کا ذکر ہو رہا ہے، انہوں نے یہ وضاحت دیتے ہوئے اپنی بات مکمل کی کہ ویسے ہم سب کو امن ہی چاہتے ہیں۔ واضح رہے کہ امریکی صدر ڈونالڈ ٹرمپ نے 17 جنوری کو اپنی سربراہی میں غزہ بورڈ آف پیس کا اعلان کیا ہے، جس میں امریکی وزیر خارجہ مارکو روبیو، مشرق وسطیٰ میں ٹرمپ کے نمائندہ اسٹیو وٹکوف شال ہیں۔ اس کے علاوہ ورلڈ بینک کے صدر اجے بنگا، ڈونالڈ ٹرمپ کے داماد جیراڈ کوشنر، سابق برطانوی وزیراعظم ٹونی بلیئر اور دیگر افراد کو شامل کیا گیا ہے۔
