گدوال ۔یکم اگسٹ ۔ ( سیاست ڈسٹرکٹ نیوز ) گدوال آر ٹی سی بس میں سفر کرنے والا ایک مسافر اس وقت حیران رہ گیا جب 30 روپئے کے ٹکٹ کے بجائے اسے 18 ہزار روپئے سے زائد کا ٹکٹ حوالے کیا گیا۔ یہ عجیب و غریب واقعہ ریاست تلنگانہ میں پیش آیا۔ گدوال آر ٹی سی ڈپو کی پلے ویلوگو بس میں ایک شخص پیبیرا سے گدوال جانے کے لئے سوار ہوا، اس نے بس کنڈکٹر کو 30 روپے ٹکٹ کے لئے دیئے کنڈکٹر نے اسے ٹکٹ حوالے کر دیا۔ مسافر یہ دیکھ کر حیرت زدہ رہ گیا کہ ٹکٹ پر 30 روپے نہیں بلکہ 18470 روپے لکھا ہوا تھا،حالانکہ اس سے کنڈکٹر نے زیادہ پیسے طلب نہیں کیے۔ جب مسافر نے بس کنڈکٹر سے وضاحت طلب کی تو اس نے بتایا کہ ٹمس مشین میں خرابی کی وجہ سے غلط رقم ٹکٹ پر درج ہوئی ہے۔آر ٹی سی کا بس ٹکٹ سوشل میڈیا پر وائرل ہو رہا ہے۔ گدوال ڈپو مینجر منجولہ کا کہنا ہے کہ ٹکٹ جاری کرنے والے مشین یعنی ٹمس میں تکنیکی خرابی کی وجہ سے زائد رقم درج ہوئی ہے اسے درست کیا جائے گا۔
