محکمہ فینانس سے 100 کروڑ روپئے کی اجرائی کا انتظار ۔ ملازمین میں ناراضگی
حیدرآباد :۔ آر ٹی سی ملازمین کو فروری کے دوسرے ہفتہ میں بھی تنخواہیں ادا نہیں کی گئیں جس سے آر ٹی سی ملازمین پریشان ہیں جاریہ ماہ 12 فروری گذر جانے کے باوجود ملازمین تنخواہوں سے محروم ہیں ۔ ذرائع کے بموجب آر ٹی سی کے پاس تنخواہوں کیلئے 20 کروڑ روپئے ہیں ۔ ماباقی 100 کروڑ محکمہ فینانس سے جاری ہونا ہے ۔ بجٹ میں حکومت سے آر ٹی سی کیلئے مختص رقم تنخواہوں پر خرچ ہورہی ہے ۔ اس ماہ محکمہ فینانس سے فنڈز کی اجرائی میں تاخیر ہوئی ۔ گذشتہ کے بہ نسبت آر ٹی سی مسافرین کی تعداد میں اضافہ ہوا ۔ یومیہ آر ٹی سی کو 12 روڑ کی آمدنی ہورہی ہے ۔ تنخواہوں کیلئے آر ٹی سی کے پاس 20 کروڑ روپئے محفوظ ہیں گذشتہ ماہ بھی یہی صورتحال تھی جس سے چند ملازمین کو پہلے اور حکومت کی جانب سے فنڈز کی اجرائی کے بعد ماباقی تنخواہیں ملازمین کو فراہم کی گئی تھی جس سے ملازمین میں بھی بے چینی پھیل گئی تھی ۔ اب انتظامیہ نے حکومت سے فنڈز کی اجرائی کے بعد تنخواہیں جاری کرنے کا فیصلہ کیا ہے ۔ ہر ماہ کی پہلی تاریخ کو ملازمین تنخواہوں کے حقدار ہیں مگر فروری کے 13 دن گذر جانے کے باوجود ملازمین تنخواہوں سے محروم ہیں ۔ آر ٹی سی بورڈ کے سابق ڈائرکٹر ناگیشور راؤ نے کہا کہ گذشتہ 11 دن میں آر ٹی سی کو 118 کروڑ کی آمدنی ہوئی ہے ۔ پھر بھی آج تک ملازمین کو تنخواہیں ادا نہ کرنے کی سخت مذمت کی ہے ۔
