ہڑتالی ملازمین سے بات چیت کرنے کی پیشکش، چیف منسٹر کے ردعمل کا انتظار
حیدرآباد۔17 اکٹوبر (سیاست نیوز) آر ٹی سی ملازمین کی ہڑتال کے تناظر میں ٹی آر ایس کے سکریٹری جنرل ڈاکٹر کے کیشو رائو اور وزیر ٹرانسپورٹ پی اجئے کمار نے آج چیف منسٹر کے چندر شیکھر رائو سے ملاقات کی۔ اس ملاقات کو ہڑتال کی یکسوئی کے سلسلہ میں پیشرفت تصور کیا جارہا ہے۔ بتایا جاتا ہے کہ کیشور رائو نے آر ٹی سی جے اے سی کے ساتھ بات چیت کے بارے میں چیف منسٹر کو واقف کرایا۔ انہوں نے حکومت اور آر ٹی سی ملازمین کے درمیان مصالحت کار کا رول ادا کرنے کی پیشکش کی ہے۔ ہائی کورٹ نے حکومت اور آر ٹی سی ملازمین کو مذاکرات کے لیے مہلت دی ہے۔ ایسے میں چیف منسٹر سے کیشو رائو اور وزیر ٹرانسپورٹ کی بات چیت مزید اہمیت اختیار کرچکی ہے۔ ہائی کورٹ کے مشورے کے مطابق جمعہ 18 اکٹوبر تک مذاکرات کا آغاز ہونا چاہئے۔ چیف منسٹر سے ملاقات کے بعد اگرچہ کیشو رائو نے میڈیا سے بات چیت نہیں کی تاہم آر ٹی سی ملازمین پرامید ہیں کہ کوئی بہتر اور قابل قبول حل نکل آئے گا۔ واضح رہے کہ کیشو رائو نے دو دن قبل بیان جاری کرتے ہوئے آر ٹی سی ملازمین سے اپیل کی تھی کہ وہ ہڑتال سے فوری دستبرداری اختیار کرتے ہوئے بات چیت کے لیے تیار ہوں تو وہ مصالحت کا رول ادا کرنے تیار ہیں۔ ان کے بیان پر حکومت کی جانب سے کسی ردعمل کا اظہار نہیں کیا گیا جس پر وہ خاموش ہوگئے تھے۔ انہوں نے واضح کردیا تھا کہ ہڑتالی ملازمین سے بات چیت کرنا حکومت کی ذمہ داری ہے اور انہیں حکومت کی جانب سے کوئی ہدایت موصول نہیں ہوئی۔ امید کی جارہی ہے کہ ہڑتال کے خاتمہ کے لیے کے سی آر تلنگانہ تحریک میں ملازمین کے ساتھ وابستہ رہ چکے کیشو رائو کی خدمات حاصل کریں گے۔ اسی دوران وزیر ٹرانسپورٹ نے جائزہ اجلاس منعقد کرتے ہوئے ہڑتال کی صورتحال پر عہدیداروں سے رپورٹ طلب کی۔ انہوں نے عہدیداروں کو ہدایت دی کہ وہ شہر اور اضلاع میں تمام تر متبادل انتظامات کو یقینی بنائے تاکہ عوام کو سفر میں کوئی دشواری نہ ہو۔
