نئی دہلی۔ 29 اکٹوبر (ایجنسیز) راجستھان ہائی کورٹ نے عصمت دری کے سنگین کیس میں عمر قید کی سزا کاٹ رہے خود ساختہ گاڈمین آسارام باپو کو طبی بنیادوں پر چھ ماہ کی ضمانت دے دی ہے۔یہ فیصلہ چیف جسٹس سنجیو پرکاش شرما اور جسٹس سنگیتا شرما کی ڈویڑن بنچ نے آسارام کی سزا معطلی اور باقاعدہ ضمانت کی درخواست پر سماعت کے بعد سنایا۔دونوں فریقوں کے دلائل سننے کے بعد عدالت نے یہ فیصلہ دیا کہ 84 سالہ آسارام کو چھ ماہ کے لیے علاج کی غرض سے ضمانت دی جائے گی۔ عدالت نے واضح کیا کہ یہ ضمانت مستقل نوعیت کی نہیں ہے اور صرف طبی سہولت کے لیے دی جا رہی ہے۔یاد رہے کہ آسارام کو 2018 میں ایک نابالغ لڑکی کے ساتھ عصمت دری کے جرم میں عمر قید کی سزا سنائی گئی تھی۔ وہ جودھپور جیل میں سزا کاٹ رہا ہے۔