سٹی کنونشن سنٹر پر خاتون پائلیٹس اجمیرہ بابی اور سلویٰ فاطمہ نے افتتاح کیا
حیدرآباد /25 اکٹوبر ( سیاست نیوز ) ادارہ سیاست کی جانب سے منعقدہ سہ روزہ ’’جشن نکاح ‘‘ کاآج خاتون پائلیٹس اجمیرہ بابی اورسیدہ سلویٰ فاطمہ نے افتتاح عمل میں لایا ۔ شادی بیاہ کی تقاریب کی تیاری کرنے والے والدین اور سرپرستوں کی سہولت کیلئے ایک ہی چھت کے نیچے تمام سرکردہ تاجرین کو پیش کیا جارہا ہے ۔ جن تاجرین کے یہاں شادی بیاہ کیلئے خریداری کی جاتی ہے یہ تمام تاجرین اس جشن نکاح میں حصہ لے رہے ہیں ۔ 25 تا 27 اکٹوبر کے دوران سٹی کنونشن سنٹر ، نامپلی میں جاری اس جشن نکاح میں شادی بیاہ کی تقاریب کی تمام ضروری اشیاء موجود رہے گی ۔ ’’جشن نکاح کا افتتاح کرتے ہوئے خاتون پائلیٹس اجمیرہ بابی اور سلویٰ فاطمہ نے اظہار مسرت کیا ۔ ادارہ سیاست اور کرشمہ دی ویڈنگ مال کی جانب سے اور مبارک رشتہ کے تعاون اور اشتراک سے جشن نکاح کا انعقاد عمل میں لایا گیا ہے ۔ جس میں 20 مختلف اہم اور ضروری اشیاء بشمول ملبوسات ، زیورات ، جوتے اور چپل ، سجاوٹ ، فوٹو گرافی ، کیک اور کیٹرنگ کے خدمت کے علاوہ میک اپ کا سامان ، عطریات و پرفیوم دعوت ناموں کی تیاری اور دیگر اشیاء کی نمائش ہوگی ۔ یہ نمائش ہفتہ اور اتوار کو صبح 10بجے تا رات 8 بجے تک جاری رہے گی ۔ منتظمین کے مطابق اس سہ روزہ جشن نکاح کے افتتاح کے دن عوام کا زبردست ردعمل رہا اور آئندہ دو آیام ہفتہ اور اتوار بھی عوام کی کثیر تعداد اس جشن نکاح میں پہونچنے کی توقع ہے ۔ مزید تفصیلات کیلئے 9246365401/ 9246579695 پر ربط قائم کیا جاسکتا ہے ۔