غزہ26 اکتوبر ( سیاست ڈاٹ کام ) غزہ کی پٹی میں ہفتہ وار احتجاجی مظاہروں کے دوران اسرائیلی ڈیفنس فورسز کے ساتھ جھڑپوں میں 81 فلسطینی شہری زخمی ہو گئے ۔فلسطینی خبر رساں ایجنسی ڈبلیواے ایف اے نے بتایا کہ زخمیوں میں 11 بچے و طبی افسران شامل ہیں ۔ رپورٹ کے مطابق 37 افراد بندوق کی گولی لگنے سے زخمی ہوئے جبکہ 29 افراد کو ربڑ کی گولیاں لگیں۔ آئی ڈی ایف نے اس دوران آنسو گیس کا استعمال کیا۔اسرائیل کے خلاف فلسطینی شہریوں کا یہ مسلسل 80 ویں دن احتجاج و مظاہرہ ہے ۔ انہوں نے مارچ 2018 میں اسرائیل کے خلاف ‘دی گریٹ مارچ آف رٹرن’ نامی مہم کی شروعات کی تھی۔قابل غور ہے کہ اسرائیل اور فلسطین کے سرحدی علاقہ غزہ پٹی پر اکثر اسرائیلی سیکورٹی فورسز اور فلسطینی مظاہرین کے درمیان پرتشدد جھڑپیں ہوتی ہیں جن میں تاحال کافی جانی نقصان ہوا ہے ۔فلسطین اور اسرائیل کے درمیان دہائیوں سے جدوجہد چلی آ رہی ہے ۔ اسرائیل مغربی کنارہ اور غزہ پٹی پر فلسطین کی خود مختاری ماننے سے مسلسل انکار کرتا ہے ۔
