تل ابیب : اسرائیلی فوج کی جانب سے امریکی نیوز چینل سی این این سے تعلق رکھنے والے صحافی سے کی گئی بدسلوکی کی ویڈیو سوشل میڈیا پر گردش کررہی ہے۔سوشل میڈیا پر گردش کرنے والی اس ویڈیو کلپ میں سی این این کے رپورٹر کو اسرائیلی فورسز میں گھرے ہوئے اور ان کی جانب سے دھکے دیتے ہوئے دیکھا جاسکتا ہے۔ویڈیو کلپ میں دیکھا جاسکتا ہے کہ سی این این کے سینئر صحافی بین ویڈیمین کو اسرائیلی فوجیوں نے پتھروں سے بنی رکاوٹ کے قریب گھیر رکھا ہے اور انہیں دھکیلا جا رہا ہے۔بین ویڈیمین، شام کے تنازعہ کے دوران رپورٹنگ کرچکے ہیں اور انہوں نے 2014 میں غزہ میں ہونے والی جنگ کی کوریج بھی کی تھی۔ویڈیو میں بین ویڈیمین کو مایوس کی حالت میں اپنے ہاتھ کو دیکھتے ہوئے جائے وقوعہ سے دور جاتے دیکھا جاسکتا ہے جو شاید دھکم پیل کے دوران زخمی ہوگیا تھا۔یہ ویڈیو مشرق وسطیٰ میں اسکائی نیوز کے نامہ نگار مارک اسٹون نے ٹوئٹ کیا جو ان دنوں اس خطے سے رپورٹنگ کررہے ہیں۔اسی ویڈیو کلپ میں دیکھا جاسکتا ہے کہ ایک اور اسرائیلی، دوسرے صحافی کو پرتشدد انداز میں دھکیل رہا ہے۔اسکائی نیوز کے رپورٹر نے نشاندہی کی ہے کہ اسرائیلی فوجیوں کا ایسا رویہ کوئی پہلا واقعہ نہیں ہے۔ٹوئٹ میں مارک اسٹون نے لکھا کہ’ اسرائیلی پولیس سی این این کے صحافی بین ویڈیمن اور ان کے عملے کو پیچھے دھکیلتے ہوئے، ہمارے ساتھ ہفتے بھر سے یہی ہوتا رہا ہے۔انہوں نے مزید لکھا ‘آج میں ایک پولیس اہلکار کے پاس سے گزرا، میں نے مسکرا کر ہیلو کہا جس کے جواب میں پولیس اہلکار نے نامناسب زبان استعمال کی’۔ایک اور ٹوئٹ میں مارک اسٹون نے بتایا کہ ‘میں نے آج اسرائیلی فوج کی اشتعال انگیز رویوں کے بہت سے واقعات دیکھے’۔