یروشلم۔اسرائیل کی پولیس نے مغربی کنارے میں ایک فلسطینی کو افسر کو کار تلے کچلنے کی کوشش کا الزام عائد کرتے ہوئے فائرنگ کرکے قتل کردیا۔عالمی خبر رساں ایجنسی کے مطابق اسرائیلی پولیس نے فائرنگ کرکے ایک فلسطینی کا قتل کردیا جس کے بارے میں ان کا کہنا تھا کہ انہوں نے پولیس افسر کو کچلنے کی کوشش کی تھی۔پولیس ترجمان کا کہنا تھا کہ واقعہ مشرقی یروشلم کے علاقے ابودیس میں اسرائیلی فوج کے چیک پوائنٹ کے قریب پیش آیا جبکہ پولیس افسر معمولی زخمی ہوا۔فلسطینی حکام کی جانب سے واقعہ پر کوئی بیان سامنے نہیں آیا۔اسرائیلی وزیراعظم بنجامن نیتن یاہو کی کابینہ کے یکم جولائی سے مغربی کنارے کے انضمام کے فیصلہ کے بعد فلسطین میں کشیدگی پائی جاتی ہے اور اسی دوران ایک فلسطینی کو نشانہ بنایا گیا۔فلسطینیوں نے اسرائیلی وزیراعظم کے فیصلہ کو مسترد کردیا جبکہ اقوام متحدہ سمیت دنیا کے دیگر ممالک نے بھی تشویش کا اظہار کیا تھا۔اقوام متحدہ کے انسانی حقوق کونسل کے کم از کم 50 ماہرین نے گزشتہ ہفتے اسرائیل کی جانب سے مقبوضہ مغربی کنارے کے انضمام کے منصوبے کو ‘اکیسویں صدی کی عصبیت کا وژن‘ قرار دیتے ہوئے مذمت کی تھی۔ماہرین نے خبردار کیا تھا کہ اس طرح کا قدم بین الاقوامی قانون کی خلاف ورزی ہوگی اور اس کے نتائج فلسطینی بانتستان کے طور پر نکلیں گے ۔