غزہ : اسرائیل نے غزہ کے الشفا اسپتال کو خالی کرنے کی دھمکی دے دی جس پر ہاسپٹل کو خالی کرنے کا انتہائی تکلیف دہ عمل جاری ہے۔عرب میڈیا کے مطابق غزہ پر حملہ آور اسرائیلی فورسز کی جانب سے جاری بیان میں دھمکی دی گئی تھی کہ الشفا ہاسپٹل میں موجود ڈاکٹرز، مریض، زخمی اور پناہ گزین ایک گھنٹے کے اندر ہاسپٹل خالی کردیں ورنہ برے نتائج کا سامنا کرنا ہوگا۔عرب میڈیا کے مطابق اسرائیلی فوج نے ڈاکٹرز، مریضوں اور بے گھر افراد کو ایک گھنٹے میں الشفا اسپتال خالی کرنے کا حکم دیا ہے۔اس حوالے سے الشفا اسپتال کے ڈاکٹر نے کہا ہے کہ اسرائیلی فوج نے ایک گھنٹے میں ہاسپٹل سے نکل کر جنوب کی طرف جانے کوکہا ہے۔الشفا ہاسپٹل کے ڈاکٹر کا کہنا ہے کہ ہاسپٹل سے ایک گھنٹے کے اندر انخلاء کرنا ممکن نہیں، زخمیوں اور بچوں کے انخلاء کے لیے ایمبولینسیں بھی موجود نہیں ہیں۔واضح رہے کہ غزہ میں اسرائیلی حملوں میں شہداء کی تعداد 12 ہزار سے زائد ہو گئی ہے۔
غیر ملکی میڈیا کے مطابق اسرائیلی حملوں میں زخمیوں کی تعداد 30 ہزار سے بھی زیادہ ہے۔غیر ملکی میڈیا کے مطابق 7 اکتوبر سے جاری اسرائیلی حملوں میں 5 ہزار بچے اور 3300 خواتین شہید ہوئیں جبکہ 1800 بچوں سمیت تقریباً 4 ہزار فلسطینی لاپتہ ہیں اور متعدد کے ملبے تلے دبے ہونے کا خدشہ ہے۔