کابل ۔29ستمبر ( سیاست ڈاٹ کام ) افغانستان کے صدارتی انتخابات کا عمل مکمل ہونے کے بعد موجودہ صدر اشرف غنی نے طالبان سے لوگوں کی مرضی کا احترام کرتے ہوئے جنگ کو ختم کرنے کی اپیل کی ہے۔اشرف غنی نے ہفتہ کو ایک بیان میں طالبان سے کہا ‘آپ کے لیے امن کے دروازے کھلے ہیں۔’افغانستان کے الیکشن کمیشن کے مطابق پولنگ مراکز پر طویل قطاروں کی وجہ سے ووٹنگ میں دو گھنٹے کی توسیع کی گئی تاہم رائے دہی کا فیصد بظاہر کم رہا۔خیال رہے کہ طالبان نے انتخابات کے دوران پولنگ سٹیشنز کو نشانہ بنانے کی دھمکی دی تھی جس کے پیش نظر سکیورٹی کے سخت انتظامات کیے گئے تھے۔پورے ملک میں سکیورٹی فورسز کے 70 ہزار سے زائد فورس تعینات کیے گئے تھے۔سکیورٹی خدشات کے پیشِ نظر حکام نے کابل میں شہر کے کچھ حصوں کی جزوی ناکہ بندی کی اور شہر میں ٹرکوں کے داخلے پر پابندی عائد کر دی تاکہ خود کش حملہ آوروں کو شہر میں داخل ہونے سے روکا جا سکے۔خبر رساں ادارے روئٹرز کے مطابق افغانستان کے صوبے قندھار کے ایک پولنگ مراکز کے قریب دھماکے کے نتیجے میں متعدد ووٹرز زخمی ہوئے جنھیں قندھار کے ایک ہسپتال میں طبی امداد دی گئی۔