لکھنؤ۔25؍اکتوبر ( ایجنسیز ) سماجوادی پارٹی کے سینئر لیڈر اور یوپی کے سابق وزیر اعظم خان کے پوسٹر پر سیاہی پوتنے کا واقعہ پیش آیا ۔یو پی کے بستی میں ہوئی واردات کیخلاف پولیس نے شیوسینا کے 4 لیڈروں کیخلاف مقدمہ درج کر لیا ہے۔ سماجوادی پارٹی نے اپنی شکایت میں الزام عائد کیا گیا ہے کہ شیوسینا کے کارکنوں نے جان بوجھ کر فرقہ وارانہ ہم آہنگی میں خلل ڈالنے کیلئے ایسا کیا۔سماجوادی یووجن سبھا کے ضلع صدر وپن کمار ترپاٹھی نے بتا یا کہ چھٹ پوجا کی مبارکبادی پیغامات والے ہورڈنگز چسپاں کئے تھے جن میںپارٹی کے دیگر لیڈروں کے ساتھ اعظم خان کی تصویر بھی تھی۔ جمعرات کی شام شیو سینا کے ضلع انچارج پرمود پانڈے، آشیش گپتا، نریندر دوبے، وویک بگھیل اور ان کے چار ساتھیوں نے مل کر ہورڈنگ پر لگی اعظم خان کی تصویر پر سیاہی پوت دی۔ اس واقعہ پر پارٹی نے سخت احتجاج کیا۔
اس واقعہ کے بعد ضلع میں سیاسی کشیدگی بڑھ گئی ہے۔سماجوادی پارٹی کارکنوں نے شیو سینا کے اس اقدام کی سخت مذمت کی ہے اور اسے فرقہ وارانہ ہم آہنگی میں خلل ڈالنے کی کوشش قرار دیا ہے۔ تاہم شیوسینا کی طرف سے ابھی تک اس معاملے پر کوئی ردعمل سامنے نہیں آیا ہے۔ حال ہی میں سماجوادی پارٹی نے بہار اسمبلی انتخابات کے لئے اپنے اسٹار کمپینروں کی لسٹ جاری کی ہے جس میں سماجوادی پارٹی کے بانی رہنما اعظم خان کا نام بھی شامل ہے۔
