کابل: طالبان حکومت نے ایک انوکھا فیصلہ کیا ہے جس کے مطابق اب لفظ ‘پارٹی‘ کے استعمال کو جرم قرار دیا ہے ۔میڈیا کے مطابق افغانستان میں امریکہ کے انخلا اور طالبان حکومت کے قیام کے بعد خواتین کی تعلیم، ملازمت، پارکوں میں آمد پر پابندی، ہیر اور بیوٹی سیلون دکانوں پر پابندی کے بعد سیاسی جماعتوں پر پابندی عائد کی گئی تھی اور اب نئے فیصلے نے دنیا کو حیران کر دیا ہے ۔رپورٹ کے مطابق افغانستان کے قائم مقام وزیر انصاف عبدالحکیم شرعی نے کہا کہ افغانستان میں سیاسی جماعتوں پر پابندی ہے اور پارٹی کا لفظ استعمال کرنا بھی قانون کے تحت جرم ہے ۔عبدالحکیم شرعی نے کہا کہ یہ لفظ وزارت انصاف کے تحت گزشتہ برس ہی غیر قانونی قرار پایا تھا، پارٹیوں کی اس نظام میں کوئی جگہ نہیں ہے ۔ان کا کہنا تھا کہ قانونی اعتبار سے سیاسی جماعت یا حزب کا نام لینا جرم ہے ، جب فتح آئی تو جس کو نظام اچھا لگا تو رک گیا جسے پسند نہیں آیا وہ مختلف راستوں سے نکل گیا۔
