کابل: افغانستان میں تعینات امریکی دستوں کی تعداد اب ڈھائی ہزار ہے۔ صدر ڈونالڈ ٹرمپ نے اس کٹوتی کا اعلان گزشتہ برس نومبر میں کیا تھا اور اسے اب عملی جامعہ پہنایا گیا ہے۔ ٹرمپ نے جمعرات کی شب اس بارے میں اپنا ایک مختصر بیان بھی جاری کیا، جس میں انہوں نے بتایا کہ یہ گزشتہ 19برسوں میں افغانستان میں تعینات امریکی فوجیوں کی سب سے کم تعداد ہے۔ کئی امریکی اور ناٹو کمانڈرز نے افغانستان سے غیر ملکی افواج کے قبل از وقت انخلاء سے خبردار کیا تھا تاہم ٹرمپ نے گزشتہ چند ہفتوں کے دوران افغانستان سے ڈھائی ہزار اور عراق سے پانچ سو امریکی فوجیوں کو وطن واپس بلا لیا ہے۔
