لشکر گاہ۔ 14 مارچ ۔ ( سیاست ڈاٹ کام ) فغانستان کے جنوبی صوبہ ہلمند میں ہوئے تصادم میں دو اعلیٰ کمانڈروں سمیت پانچ شدت پسند ہلاک ہوگئے ہیں۔صوبائی پولیس ترجمان محمد زمان ہمدرد نے بتایا کہ ضلع مارجاکے کیمپ بازار علاقہ میں شدت پسندوں اور سیکورٹی فورسیز کے درمیان تصادم ہوا۔تصادم میں مارے گئے شدت پسندوں میں دو اعلیٰ کمانڈر عمری اور مسافر بھی شامل ہیں۔ انھوں نے کہا کہ اس تصادم میں سیکورٹی فورسیز کاکوئی جانی نقصان نہیں ہوا ہے ۔لیکن شدت پسندوں کی طرف سے داغے گئے مارٹرحملہ میں ایک مکان کو نقصان پہنچا ہے ۔ جس میں تین شہری زخمی ہوگئے ہیں ۔سیکورٹی فورسیز نے مارجا اور ناوا اضلاع کے قریب سڑک کنارے 15 بموں کا پتہ لگاکر انہیں ناکارہ بنا دیا ہے ۔شدت پسند تنظیم طالبان نے سیکورٹی فورسیز کے ساتھ تصادم سے متعلق کسی قسم کے ردعمل کا اظہار نہیں کیا ہے ۔طالبانی گروپ اور امریکہ کے درمیان قطر کے دارالحکومت دوحہ میں ہوئے پرامن معاہدہ کے بعد افغانستان میں تشدد کے واقعات کم ہونے کی امید ظاہر کی گئی ہے ۔اس معاہدہ کی بنیاد پر امریکہ اور افغان حکومت نے فروری کے آخر میں مشترکہ اعلامیہ بھی جاری کردیا ہے ۔
