راولپنڈی’ 28فروری (سیاست ڈاٹ کام) پاکستان کے فوجی سربراہ جنرل قمر جاوید باجوہ کا کہنا ہے کہ معاشی خود مختاری کے بغیر کوئی دوسری خودمختاری ممکن نہیں ہوسکتی ۔فوج کے ترجمان میجرجنرل آصف غفور نے ٹوئٹ کرکے کہا کہ ملک سنگین اقتصادی بحران کے دور سے گذر رہا ہے ۔جنرل باجوہ ‘پاکستانی معیشت: چیلنجز اینڈ وے فارورڈ’ کے عنوان سے منعقد سیمینار سے خطاب کررہے تھے ۔فوجی ترجمان نے جنرل باجوہ کے حوالے سے ٹوئٹ میں کہا ‘ہم سب کو اس حوالے سے اپنی ذمہ داریاں ادا کرنے کی ضرورت ہے تاکہ مشکل حکومتی اقدامات کامیاب ہوسکیں۔’ جنرل قمر جاوید باجوہ نے کہا کہ ماضی قریب میں ایسی مثالیں موجود ہیں جب دیگر ممالک نے ایسے چیلنجز کا مقابلہ کیا اور مشکل فیصلے لینے کے بعد کامیاب ہوئے ۔فوجی سربراہ نے کہا کہ ہم انشااللہ ان مشکلات سے سرخرو ہو کر نکلیں گے ۔ان کا کہنا تھا کہ مشکل حالات میں کوئی فرد واحد کامیاب نہیں ہوسکتا جب تک قوم متحد نہ ہو، وقت آگیا ہے کہ ہمیں ایک قوم بن کر سوچنا ہوگا۔