وزیرریلوے اشونی وشنو کا پہلی بار حادثہ پر بیان
نئی دہلی: بالاسور ٹرین حادثے کے بعد ٹریک کو صاف کرنے اور بحال کرنے کا کام جنگی بنیادوں پر جاری ہے۔ ریلوے کے وزیر اشونی ویشنو خود جائے حادثہ پر موجود ہیں اور ٹریک کی بحالی کے لیے کیے جا رہے کام کی نگرانی کر رہے ہیں۔ دریں اثناء وزیر ریلوے نے اہم بیان دیتے ہوئے کہا ہے کہ حادثے کے ذمہ داروں کی شناخت کر لی گئی ہے اور ان کے خلاف سخت کارروائی کی جائے گی۔ انہوں نے بتایا کہ چہارشنبہ کی صبح سے ٹریک پر ٹریفک کی بحالی شروع ہو جائے گی۔انہوں نے کہا کہ ممتا بنرجی نے جو کہا وہ نہیں، بلکہ حادثہ کی وجہ کچھ اور تھی۔ ممتا بنرجی کے الزامات پر وزیر ریلوے نے کہا کہ اس کا کَوچ سے کوئی لینا دینا نہیں ہے۔ وجہ وہ نہیں جو ممتا بنرجی نے کل کہی تھی۔ کمشنر آف ریلوے سیفٹی نے معاملے کی جانچ کی ہے۔ حادثہ‘ الیکٹرانک انٹر لاکنگ میں تبدیلی کی وجہ سے پیش آیا۔ انہوں نے کہا کہ تمام نعشیں نکال لی گئی ہیں اور ہمارا ہدف بدھ کی صبح تک مرمت کا کام مکمل کرنا ہے تاکہ اس ٹریک پر ٹرینیں چلنا شروع ہو سکیں۔ تمام ڈبوں کو ہٹا دیا گیا ہے۔ کام تیزی سے جاری ہے۔ چہارشنبہ کی صبح تک معمول کے راستے کو آپریشنل کرنے کی کوشش کی جا رہی ہے۔وہیں، مرکزی وزیر دھرمیندر پردھان نے کہا یہ ہماری ذمہ داری ہے کہ جلد سے جلد حالات معمول پر آ جائیں۔ ہندوستانی ریلوے مفت ٹرینیں چلا رہی ہے۔ بچاؤ اور راحت کے کاموں کے بعد ریلوے نے ہفتہ کی رات ہی پٹریوں سے زیادہ تر ملبہ ہٹا لیا ہے اور جلد ہی ٹریک کو شروع کرنے کی کوششیں جاری ہیں۔
