دمام ۔4 جون (سیاست ڈاٹ کام) سعودی عرب کے وزارت اسلامی امور نے کورونا کے شبے میں دمام میں ایک مسجد کو وقتی طور پر بند کر دیا ہے۔ ویب سائٹ کے مطابق وزارت نے کہا ہے کہ مذکورہ مسجد کے امام کو کورونا کے شبے میں صحت حکام کے حوالے کردیا گیا ہے جبکہ احتیاطی تدابیر اختیار کرتے ہوئے مسجد بند کر دی گئی ہے۔ دمام وزارت اسلامی امور کی برانچ کے سربراہ احمد المہاشیر نے کہا ہے کہ مسجد کے امام نے خود رابطہ کر کے اطلاع دی تھی کہ انہیں شک کہ شاید کورونا کا شکار ہوگئے ہیں۔وزارت کی ٹیم نے فوری کارروائی کرتے ہوئے امام کو مزید معائنہ اور ٹسٹ کے لیے صحت حکام کے سپرد کر دیا ہے، موذن کو گھر میں محدود رہنے کی ہدایت دی ہے جبکہ متبادل امام کا انتظام ہونے تک مسجد میں نمازیں معطل کر دی ہیں۔انہوں نے کہا ہے کہ وزارت اسلامی امور نے وزارت صحت کے تعاون سے مسجد کی صفائی اور سینیٹائزنگ کا کام شروع کردیا ہے، کام مکمل ہوتے ہیں مسجد دوبارہ کھول دی جائے گی۔کسی بھی مسجد میں امام یا موذن یا نمازیوں میں سے کسی میں کورونا کا شبہ ہوا تو وہاں اسی طرح کی کارروائی کی جائے گی۔
