چنڈی گڑھ: خالصتان کی حمایت کرنے والے امرت پال سنگھ کو آج موگا ضلع میں گرفتار کرلیا گیا ہے ۔ امرت پال پر این ایس اے لگاتے ہوئے اسے آسام کی ڈبرو گڑھ جیل بھیجنے کی تیاری شروع کر دی گئی ہے۔ پنجاب پولیس اور انٹیلی جنس بیورو کی مشترکہ کارروائی میں امرت پال گرفتار ہوا ہے۔ امرت پال گذشتہ کئی دنوں سے مفرور تھا۔ پنجاب پولیس اور سیکیورٹی ادارے مسلسل اس کی تلاش میں لگے ہوئے تھے۔ امرت پال کو پکڑنے کے لیے پورے ملک میں نیپال کی سرحد تک آپریشن چلائے گئے۔
پنجاب پولیس نے ٹویٹ کرتے ہوئے اطلاع دی ہے کہ ‘امرت پال سنگھ کو آج موگا ضلع سے گرفتار کیا گیا ہے۔ اس کے ساتھ ہی پولیس نے شہریوں سے امن اور ہم آہنگی برقرار رکھنے کی اپیل کی ہے اور کسی قسم کی فرضی خبریں شیئر نہ کرنے کی ہدایت کی ہے۔ حال ہی میں امرت پال کے سب سے اہم ساتھی پپل پریت سنگھ کو پولیس نے گرفتار کیا تھا۔ اس کے بعد 15 اپریل کو امرت پال کے سب سے اہم ساتھی جوگا سنگھ کو فتح گڑھ صاحب ضلع سے پکڑا گیا تھا۔ امرت پال پولیس اور سیکورٹی ایجنسیوں کو مسلسل چکما دے رہا تھا۔ بتایا جا رہا ہے کہ امرت پال کو جرنیل سنگھ بھنڈرانوالے کے آبائی گاؤں سے گرفتار کیا گیا ہے۔
