انقرہ، 18 اکتوبر (سیاست ڈاٹ کام) ترکی کے صدر طیب اردغان نے کہا ہے کہ امریکہ اور انقرہ کی مشترکہ کوششوں سے علاقائی امن و استحکام میں مضبوطی آئے گی۔مسٹر اردغان نے یہ بات شمالی شام میں ترکی کی فوجی مہم کو ملتوی کرنے کے معاملے پر ہونے والے دو معاہدوں کے پیش نظر کہی۔ اس سلسلے میں ترکی اور امریکہ کے درمیان ایک دوطرفہ معاہدہ ہوا ہے ۔امریکہ کے نائب صدر مائیک پنس سے ملاقات کے بعد مسٹر اردغان نے اس بات کا اعلان کیا۔ انہوں نے کہا کہ دونوں ممالک کے درمیان شمالی شام میں کردش پیپلز پروٹیکشن یونٹ (وائی پی جی ) کی فوج کو ہٹانے کے لئے 120 گھنٹے تک جنگ بندی کرنے پر اتفاق ہوا ہے ۔ اس دوران ترکی اور شام کے سرحدی علاقے سے کرد قیادت والے دہشت گردوں اور دولت اسلامیہ کے دہشت گردوں کے خلاف ترکی کی فوجی مہم موخر رہے گی۔مسٹر اردغان نے ٹوئٹر پر لکھا کہ ‘‘جب ہم دہشت گردی کو شکست دیں گے تو کئی زندگیاں بچائیں گے ۔ مجھے یقین ہے کہ یہ مشترکہ کوشش ہمارے علاقے میں امن و استحکام کی حوصلہ افزائی کرے گی‘‘۔
