ریاض ۔ 8 ڈسمبر (سیاست ڈاٹ کام) سعودی عرب کی وزارت خارجہ نے جمہوریہ سوڈان اور امریکہ کے درمیان سفارتی تعلقات کی بحالی کے اعلان کا خیرمقدم کیا گیا ہے۔خیال رہے کہ امریکہ اور سوڈان کے درمیان دو عشروں سے سفارتی تعلقات منقطع چلے آ رہے ہیں۔ سوڈان میں صدر عمر البشیر کی رواں سال معزولی کے بعد خرطوم اور واشنگٹن کے درمیان قربت بہ تدریج بڑھ رہی ہے۔سعودی عرب کی سرکاری پریس ایجنسی’ایس پی اے’ کے مطابق وزارت خارجہ کی طرف سے امریکہ اور سوڈان کے درمیان سفارتی تعلقات کی بحالی کی کوششوں کا خیر مقدم کیا ہے۔ وزارت خارجہ کا کہناہے کہ توقع ہے کہ امریکہ اورسوڈان سفارتی تعلقات کی بحالی کے ساتھ ساتھ تمام شعبوں میں ایک دوسرے کے ساتھ تعلقات بحال کریں گے۔سعودی عرب نے 21 اگست 2019ء کو تشکیل پانے والی سوڈان کی عبوری حکومت کے ساتھ ہرممکن تعاون جاری رکھنے کے عزم کا اعادہ کیا ہے۔خیال رہے کہ امریکہ طویل عرصے تک سوڈان پر دہشت گردی کی پشت پناہی اور شورش زدہ علاقے دارفر میں انسانی حقوق کی سنگین پامالیوں کا الزام عاید کرتا رہا ہے۔حال ہی میں سوڈن کے عبوری وزیراعظم عبداللہ حمدوک نے امریکہ کا دورہ کیا۔
اپنے اس دورے کے دوران انہوں نے کہا کہ انہوں نے امریکی حکام سے دو طرفہ سفاتی تعلقات کی بحالی پر بات چیت کی ہے۔ امریکہ نے عندیہ دیا ہے کہ وہ جلد ہی خرطوم کیساتھ سفارتی تعلقات بحال کرلے گا۔
