واشنگٹن2مئی (سیاست ڈاٹ کام ) امریکہ میں بین الاقوامی ورکرز ڈے یعنی یکم مئی کو اضافی سیکورٹی اقدامات اور عالمی وبا کوروناوائرس (کوویڈ۔ 19)کی وجہ سے لاگو لاک ڈاؤن کے بعد قومی معیشت کو دوبارہ کھولنے کے مطالبہ کے حوالہ سے ملک بھر میں احتجاج ہوئے ۔سینکڑوں مظاہرین نے دن بھر ملک بھر میں منعقد مظاہروں میں حصہ لیا۔ نیشنل نرسیز یونائیٹڈ ( این این یو) کی 15000 نرسوں نے ملک کی 13 ریاستوں میں منعقد تقریبا 140 ریلیوں میں حصہ لیا اور انتظامیہ سے ماسک اور دیگر حفاظتی سامان مہیا کرانے کی مانگ کی۔ این این یو کی ایگزیکٹیو ڈائریکٹر بونی کیسٹیلو نے ٹوئٹر پر لکھا’’جب نرسیں محفوظ نہیں ہیں، تو مریض بھی محفوظ نہیں ہیں‘‘۔انہوں نے کہا کہ نرسیں لوگوں کا علاج کرنے کے لئے تیار ہیں ، لیکن کورونا وائرس کی جنگ میں فرنٹ لائن میں خود کو قربان کرنے کے لئے نہیں۔
