واشنگٹن، 28 جنوری (یو این آئی) امریکی صدر ٹرمپ نے کہا ہے کہ آج سے وسط مدتی انتخاب کی مہم شروع کررہے ہیں۔ صدر ٹرمپ نے آیئوا میں تقریب سے خطاب کرتے ہوئے کہا کہ یہ انتخابات باآسانی جیت جائیں گے ، اگر ہم وسط مدتی انتخابات ہار گئے تو امریکہ بہت کچھ کھو دے گا۔ ایک سال پہلے امریکہ میں تاریخی مہنگائی تھی، آج امریکی معیشت مستحکم ہورہی ہے ، مہنگائی کم ہے ، تاریخ کا سب سے بڑا ٹیکس ریلیف دے رہا ہوں۔ صدر ٹرمپ نے کہا کہ سرحدوں کو غیرقانونی تارکین وطن کیلئے مکمل بند کردیا ہے ، امریکہ آج سرمایہ کاروں کیلیے محفوظ ملک ہے ۔ امریکی صدر کا کہنا تھا کہ بائیڈن کے 4 سالہ دور میں امریکہ میں ایک ٹریلین ڈالر کی سرمایہ کاری آئی، ہمارے ایک سال کے دوران سرمایہ کاری کا حجم 18 ٹریلین ڈالر تک پہنچ گیا۔ انہوں نے کہا کہ امریکہ کی جتنی عزت اب دنیا میں ہے پہلے کبھی نہیں تھی، جاپان، برطانیہ اور آسٹریلیا امریکہ میں تاریخی سرمایہ کاری کررہے ہیں۔ صدر ٹرمپ نے کہا کہ ایک بحری بیڑا ایران کی طرف بڑھ رہا ہے ۔ ان کا کہنا تھا کہ جون میں ایران کی جوہری صلاحیت کو ختم کیا، ایران میں فوجی کارروائی میں کوئی بھی شہری نہیں مارا گیا، امید ہے ایران ہم سے ڈیل کرلے گا۔
’غزہ بورڈ آف پیس‘میں طاقت کا محور
ٹرمپ ہوں گے :امریکی میڈیا
نیویارک، 28 جنوری (یو این آئی) امریکی اخبار میں دعویٰ کیا گیا ہے کہ غزہ بورڈ آف پیس میں طاقت کا محورصدر ڈونالڈ ٹرمپ ہوں گے ۔ امریکی اخبار کے مطابق بورڈ آف پیس قرارداد کے متن کے مطابق غزہ کا انچارج امریکہ ہوگا، اگلے بورڈ آف پیس چیئرمین نامزد کرنے کا مکمل اختیار بھی ڈونلڈ ٹرمپ کے پاس ہوگا۔ اخبار میں کہا گیا ہے کہ غزہ بورڈ آف پیس معاہدے میں شامل دیگر ملکوں کا کردار معاون کا ہوگا۔ واضح رہے کہ امریکی صدر ٹرمپ کی جانب سے تشکیل دیے گئے غزہ بورڈ آف پیس میں پاکستان، قطر، سعودی عرب، ترکیے ، انڈونیشیا، بحرین، مصر، اردن، قازقستان، ازبکستان اور متحدہ عرب امارات (یو اے ای) شمولیت اختیار کرچکے ہیں۔ اس کے علاوہ ارجنٹینا، آرمینیا، آذربائیجان، بیلاروس، ہنگری، کوسوو، مراکش اور ویتنام نے بھی غزہ بورڈ آف پیس میں شمولیت کا اعلان کیا ہے جبکہ اٹلی اور اسپین نے غزہ بورڈ آف پیس میں شمولیت سے انکار کر دیا ہے ۔