واشنگٹن، 18 جولائی (یو این آئی) امریکہ نے بڑا قدم اٹھاتے ہوئے پاکستان میں قائم لشکر طیبہ (ایل ای ٹی) کے دہشت گرد گروپ کی ایک شاخ‘دی ریزسٹنس فرنٹ(ٹی آر ایف) کو غیر ملکی دہشت گرد تنظیم(ایف ٹی او) قرار دیا ہے ۔ یہ تنظیم 22 اپریل کو پہلگام دہشت گردانہ حملے کی ذمہ دار ہے ۔امریکی وزیر خارجہ مارکو روبیو نے ایک بیان میں کہا کہ ٹی آر ایف کو غیر ملکی دہشت گرد تنظیم اور خصوصی طور پر نامزد عالمی دہشت گرد(ایس ڈی جی ٹی) قرار دینا دہشت گردی سے نمٹنے اور صدر ٹرمپ کی پہلگام حملے کے لیے انصاف کی اپیل پر عمل درآمد کے لیے ٹرمپ انتظامیہ کے عزم کی عکاسی کرتا ہے ۔بیان میں کہا گیا ہے ‘‘آج، محکمہ خارجہ دی ریزسٹنس فرنٹ (ٹی آر ایف ) کو نامزد غیر ملکی دہشت گرد تنظیم (ایف ٹی او) اور خصوصی طور پر نامزد عالمی دہشت گرد (ایس ڈی جی ٹی) کے طور پر شامل کر رہا ہے ۔’’ لشکر طیبہ (ایل ای ٹی) کا حصہ اور پراکسی، ٹی آر ایف نے 22 اپریل 2025 کو پہلگام حملے کی ذمہ داری قبول کی، جس میں 26 شہری ہلاک ہوئے ۔سال2008 میں لشکر طیبہ کی طرف سے ممبئی حملوں کے بعد سے ہندوستان میں شہریوں پر یہ سب سے بڑا حملہ تھا۔ ٹی آر ایف نے 2024 میں حال ہی میں ہندوستانی سیکورٹی فورسز پر متعدد حملوں کی ذمہ داری بھی قبول کی ہے ۔ محکمہ خارجہ کے یہ اقدامات قومی سلامتی کے مفادات کے تحفظ، دہشت گردی کا مقابلہ کرنے اور پہلگام حملے کے لیے صدر ٹرمپ کے انصاف کے مطالبے کو نافذ کرنے کے لیے ٹرمپ انتظامیہ کے عزم کی عکاسی کرتے ہیں۔
