ٹیکسس ۔ آئی سی سی ٹی20 ورلڈ کپ سے قبل امریکہ اور بنگلہ دیش کے درمیان جاری تین ٹی20 میچوں پر مشتمل سیریز کے دوسرے میچ میں بھی امریکہ نے بنگلہ دیش کو 6 رنز سے شکست دیتے ہوئے سیریز میں 0-2 کی فیصلہ کن برتری حاصل کر لی ہے۔ ٹیکسس کے پرائرے ویو اسٹیڈیم میں کھیلے گئے میچ میں امریکہ کی جانب سے دیے گئے 145 رنز کے ہدف کے جواب میں بنگلہ دیش کی پوری ٹیم 19.3 اوورز میں 138 رنز بناکر آؤٹ ہوگئی۔ بنگلہ دیش کی جانب سے کپتان نجم الحسن شانتو نے 36، شکیب الحسن نے 30 جبکہ توحید ہری دوئے نے 25 رنز بنائے۔ امریکہ کی جانب سے علی خان نے تین، ساؤربھ نیٹراوالکر اور شیڈلی وین شال ویک نے فی کس دو وکٹیں حاصل کیں۔ مقابلے میں قبل ازیں بنگلہ دیش نے ٹاس جیت کر پہلے بولنگ کا فیصلہ کیا جس کے بعد امریکہ نے مقررہ 20 اوورز میں چھ وکٹوں کے نقصان پر144 رنز بنائے۔ امریکہ کی جانب سے کپتان موننک پٹیل نے 42، ایرون جونز نے35 جبکہ اسٹیفین ٹیلر نے 31 رنز بنائے۔ بنگلہ دیش کی طرف سے شوریفْل اسلام، مستفیض الرحمن اور رشاد حسین نے فی کس دو وکٹیں حاصل کیں۔ میچ میں عمدہ بولنگ کرنے پر فاسٹ بولر محمد علی کو پلیئر آف دی میچ کے ایوارڈ سے نوازا گیا۔ اس سے قبل21 مئی کو کھیلے گئے سیریزکے پہلے میچ میں امریکہ نے بنگلہ دیش کو 5 وکٹوں سے ہرا دیا تھا۔ خیال رہے کہ دونوں ٹیموں کے درمیان سیریزکا تیسرا اور آخری میچ 25 مئی کوکھیلا جائے گا۔
