واشنگٹن:امریکی عدالت نے 2020کے انتخابات میں مداخلت کے الزام سے متعلق کیس میں ٹرمپ کو صدارتی استثنا دینے سے انکار کردیا۔بین الاقوامی خبر رساں ایجنسیوں کے مطابق واشنگٹن ڈی سی کی عدالت نے انتخابات میں مداخلت کے الزام سے متعلق کیس میں فیصلہ سناتے ہوئے سابق صدر ڈونلڈ ٹرمپ کی فوجداری استثنا حاصل کرنے کی درخواست مسترد کردی جب کہ ڈونلڈ ٹرمپ نے عدالت کے مذکورہ فیصلے کے خلاف سپریم کورٹ جانے کا اعلان کر دیا ہے۔عدالت نے اپنے فیصلے میں کہا ہے کہ سابق امریکی صدر ڈونلڈ ٹرمپ کو صدارتی الیکشن کے لیے استثنا حاصل نہیں اور ان پر 2020کے انتخابات کو الٹانے کی سازش کے الزام میں مقدمہ چلایا جا سکتا ہے۔واضح رہے کہ سابق امریکی صدر ڈوبلڈ ٹرمپ کی جانب سے تاریخی قانونی مقدمے میں دعویٰ کیا تھا کہ وہ ان کاموں کے لیے مجرمانہ الزامات سے محفوظ ہیں جو ان کے بقول صدر کے طور پر ان کے فرائض میں شامل ہیں۔ 3ججوں پر مشتمل اپیل کورٹ پینل نے اپنی رائے میں لکھا ہم سابق صدر ٹرمپ کے اس دعوے کو قبول نہیں کر سکتے کہ ایک صدر کو ایسے جرائم کا ارتکاب کرنے کا بے حد اختیار حاصل ہے جو ایگزیکٹو اختیارات یعنی انتخابی نتائج کو تسلیم کرنے اور ان پر عمل درآمد کو بے اثر کر دے۔